GABINETE PISAS II I PARLAMENTARIONAN HUNTU A DUNA RÈSPÈT I HONOR NA SR. ANSELMUS “BOY” DAP.

GABINETE PISAS II I PARLAMENTARIONAN HUNTU A DUNA RÈSPÈT I HONOR NA SR. ANSELMUS “BOY” DAP.

 

Willemstad –  Gabinete Pisas II representá pa Promé Minister sr. Gilmar Pisas, Minister di Desaroyo Sosial, Labor i Bienestar sra. Ruthmilda Larmonie-Cecilia i Minister i Desaroyo Ekonómiko sr. Ruisandro Cijntje, huntu ku Parlamentarionan sranan. Corine Djaoen-Genaro, Giselle Mc. William, Zita Jesus-Leito, Maria Nita i Ana-Maria Pauletta, srs. Steven Croes, Quincy Girigorie,  Ramón Yung, David Seferina, Fergino Brownbill i Gilbert Doran a duna rèspèt i honor na sr. Anselmus “Boy” Dap, durante su entiero  dia 14 di novèmber 2021 na WTC.

 

Hopi a bini huntu na WTC pa tuma despedida di un persona ku tabata hopi konosí den nos komunidat.

Nos ta referí aki na sr. Anselmus Theodoor Dap, mihó konosí pa su nòmber artístiko Boy Dap.

Un persona ku a pasa e mayoría di su bida deleitando nos ku su dushi Tumbanan.

E tabata opvio ku e la sirbi nos ku plaser, debí ku durante hopi aña e la pone hopi di nos balia i gosa riba su Tumbanan.

 

E ta hasi hopi doló pa tende ku nos a perdè un di nos gran Tumbero.

E Tumbero ku a kue mas título na Festival di Tumba di Kòrsou, 10 biaha Rei di Tumba, 22 presentashon na Festival di Tumba en total i un biaha Rey di Tumba di Antias. 

E ta e kantante ku a krea diferente inovashon rondo di e ritmo di Tumba den Festival Tumba aki na Kòrsou. 

Un persona ku a risibí diferente premio i rekonosementu den su bida.

Esaki ta motibu sufisiente pa nos por konsider’é komo un Emperador, Rei i Tata di Tumba.

 

Boy su Tumbanan ainda ta zona i ta hopi popular bou di diferente generashon den nos komunidat.

Esaki ta demostrá ku e lo no bai ta fásil pa nos yama Boy ayó.

Su kurpa lo bandoná nos, pero nos lo keda kòrda Boy semper komo un di nos gran Tumberonan, nos Emperador, Rei i Tata di Tumba.

Su historia i Tumbanan mester keda bibu!

 

Nos por a eksperensiá kon den un forma festivo a tuma despedida di Boy, despues ku Boy a perkurá pa hopi goso i alegria den hopi di nos su bida.

 

Palabra ta poko pa ekspresá Boy su partida, pero apesar di esaki di parti di Gobièrnu di Kòrsou ke ekstendé nos mas profundo i sinsero kondolensia na sra. Alice Dap-Pieter i tur ku di un òf otro forma tabata forma parti di Boy su bida. 

Nos ta eksperensiá awor ku despues di 50 aña Boy a “Bòltu e Blachi” di su bida i ta bandoná e mundu aki.

 

Boy a bai, pero su Tumbanan lo keda zona i nos lo sigui baila riba nan, kòrdando semper riba Boy.

Ku su alma por sosegá na pas.

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: