Mientras proseso pa buska operadó ta kana próspero PAGO DI KUATER TRANCHE DI SESANTÍA NA ÈKS-TRAHADÓNAN DI REFINERIA ISLA TA POSIBEL DANKI NA KOLABORASHON DI GOBIÈRNU, RDK, REFINERIA ISLA I SINDIKATONAN

 

Mientras proseso pa buska operadó ta kana próspero

PAGO DI KUATER TRANCHE DI SESANTÍA NA ÈKS-TRAHADÓNAN DI REFINERIA ISLA TA POSIBEL
DANKI NA KOLABORASHON DI GOBIÈRNU, RDK, REFINERIA ISLA I SINDIKATONAN

Willemstad 22 di desèmber 2021 – Konforme promesa di Gabinete Pisas, Refineria di Kòrsou a fasilitá e proseso pa yega na pago di e di 4 tranche di sesantía na èks-trahadónan di Refineria Isla.  E esfuerso aki tabata posibel danki na kolaborashon di e sindikatonan ku ta representá e èks-trahadónan i tambe Refineria Isla/PDVSA.  E pago di e sesantía ta tuma lugá den e último siman di desèmber 2021.  Fasilitashon di e pago di e di 4 tranche di sesantía na èks-trahadónan di Refineria Isla ta sintá den e importansha pa mantené e ékspertisio di e èks-trahadónan aki na Kòrsou, ya ku presensha di trahadónan kapasitá disponibel a keda identifiká komo un di e bentahanan grandi ku nos refineria tin riba sobrá refinerianan ku ta buskando un operadó.  Mientras tantu e komishon enkargá ku e buskeda pa un operadó pa nos fasilidatnan petrolero a kontinuá ku su trabou i resientemente a emití un asina yamá ‘Request for proposal’ pa partidonan identifiká komo potenshal partnernan serio pa nos refineria.  E meta pa no mas tarda ku fin di febrüari risibí di partidonan selektá un ‘binding proposal’.  Esaki kiermèn ku direktamente despues lo por skohe e partido òf partidonan ku ta negoshá ku’né pa yega na un akuerdo.

Kambionan den mundu ta brinda pèrspèktiva nobo na nos fasilidatnan petrolero.  E situashon sigur ta diferente for di e momentu ku a kuminsá ku buskeda pa un partner stratégiko na 2013.  Awe Kòrsou ta bon aloká den e parti sur di Karibe kaminda ku banda di Venezuela a bin diskubrí petroli den suela na Guyana i Sürnam.  Banda di esaki, e echo ku hopi refineria a sera debí na e malestar den sektor petrolero den e añanan ku ta tras di lomba i sigur despues di e situashon ku COVID rònt mundu, ta hasi presensha di un refineria manera esun di nos interesante atrobe.  E tendensha den mundu ta tambe ku mientras talbes konsumo di sierto produkto petrolero manera por ehèmpel gasolin lo por baha, konsumo di otronan ta keda oumentá segun demanda ta oumentá.  Pues tin motibu pa keda kere den un industria petrolero ku pèrspèktiva intersante pa Kòrsou.

Èks-trahadónan di Refineria Isla a bai di akuerdo pa sede e debe ku Refineria Isla tin na nan na RdK komo parti di e proseso pa fasilitá pago di e di 4 tranche.  Ta trata aki di un montante di mas òf menos 13.5 mion florin.  Ta bon bisa ku PDVSA a rekonose ku nan tin e debe aki i RdK lo sinta ku PDVSA na yanuari pa atende pago di debenan. E transakshon aki ta karga aprobashon di Gobièrnu di Kòrsou, mirando e importansha pa kontené nos forsa laboral kapasitá ku mester tei disponibel ora e fasilidatnan petrolero kuminsá operá atrobe.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: