MINISTER DI HUSTISIA GILMAR PISAS TABATA DI BISHITA SERKA KÒNSÙL GENERAL DI MERKA
MINISTER DI HUSTISIA GILMAR PISAS TABATA DI BISHITA SERKA KÒNSÙL GENERAL DI MERKA
Willemstad – Minister di Hustisia Gilmar Pisas tabata di bishita serka Kònsùl General di Merka sra. Margareth (Margy) Bond dia 25 di febrüari 2022.
E bishita aki tabata den kuadro di e desaroyonan rondó di e tema di trafikashon i eksplotashon di hende i tambe e gruponan vulnerabel ku por bira víktima di trafikashon di hende.
E meta ta pa por a fiha un posishon riba e rapòrt ku a sali di parti Nashonnan Uní riba e tema di trafikashon di hende na Kòrsou. Minister di Hustisia a trese su preokupashon dilanti pa ku posibel “downgrading” na “TIER 3”, ku por tin efektonan negativo pa pais Kòrsou.
Minister di Hustisia a splika ku trafikashon i eksplotashon di hende ta un tema hopi diskutí aki na Kòrsou, pero ku pa falta di medionan finansiero ainda un por a realisá un maneho strukturá pa kombatí reto aki.
E desaroyonan rondó di Covid-19 a pone ku no por a duna tur e atenshon nesesario na e tema aki i tampoko duna e guia nesesario na esnan vulnerabel ku a bira víktima.
Lo bai hasi tur esfuerso pa den korto tempu trese un kambio di e forma ku ke sigui atendé ku e situashon aki. Lo bai hasi uso di un eksperto riba e tereno di kombatimentu di trafikashon di hende, ku na e momentonan aki ta ehersé su tarea komo “Liaison Officer”, enkargá ku “opsporingshandelingen middels de internationale informatie-uitwisseling”, aki na Kòrsou.
Konhuntamente ku esun ku ta kordiná trafikashon di hende aki na Kòrsou lo presentá un plan di akshon ku lo bai:
- Insentivá e koperashon entre partidonan pa traha mas estrecho ku otro den e kombatimentu di trafikashon di hende, pero tambe den e forma di duna un mihó servisio na e posibel víktimanan di trafikashon i eksplotashon;
- Duna kursonan di kapasitashon na e esnan ku ta enbolbí ku e tema aki pa asina nan por desaroyá un konosementu mas profundo riba e materia aki;
- Krea e posibilidat pa por sigui estudio akreditá.
Tambe lo studia e posibilidat pa introdusí un tim spesial ku por atendé mas estrecho ku e materia riba e parti investigativo.
