Trabou Pa Kòrsou a pidi enkuesta parlamentario

 

Trabou Pa Kòrsou a pidi enkuesta parlamentario

 

Riba aktuashon ‘Riot team’ 24 di yüni 2020 den fòrt.

Pa Trabou Pa Kòrsou TPK despues di 30 di mei 1969, e fecha 24 di yüni 2020 ta bai den historia di Kòrsou pa un página pretu. Riba e fecha aki a tuma lugá un manifestashon kontra di gobièrnu di Kòrsou, ku a bin kulminá den un final kaminda polis a hasi uso di ‘Riot team/Mobiele Eenheid’ dentro di murayanan di Fòrti Amsterdam. Mayoria di e manifestantenan aki tabata siguidonan di e partidonan polítiko MFK, Pueblo Soberano i Kòrsou di Nos Tur. Despues di e aktuashon di ‘Mobiele Eenheid /Riot team’ ku a kore ku e manifestantenan for di den Fòrti Amsterdam, a kontinuá un seri di destrukshon, ladronisia i asta a pega un outo di polis na kandela. Tur esakinan ta wòrdu desaprobá pa Trabou pa Kòrsou TPK.

 

Despues di e susesonan riba e fecha di 24 di yüni 2020, Trabou pa Kòrsou TPK a tuma nota ku hefe di Kuerpo Polisial Kòrsou a buta su funshon na disposishon di Gobièrnu di Kòrsou. Tambe TPK a tuma nota ku a persiguí, detené i enkarselá algun di esnan ku a kometé e delitunan penal. Huntu ku esaki den korte a pone e hóben Mutueel responsabel pa e akontesimentunan riba e fecha aki.

 

Dia 24 yüni 2020 entre otro parlamentario di MFK, nos aktual minister presidente huntu ku otro parlamentarionan a pidi un reunion públiko ku karakter di urgensia ku e tópiko ‘susesonan ku a tuma lugá den sentro di siudat 24 di yüni 2020’. Dia 29 di yüni 2020 parlamento di Kòrsou a tene un reunion públiko riba e susesonan di 24 yüni 2020, pero despues di preguntanan di prome tanda e èks-minister di Hustisia Sr. Q. Girigorie a pidi pa skòrs e reunion te un próksimo aviso pa e por haña tempu pa kontesta parlamento, pero te awe parlamento no a risibí e kontestanan aki. Trabou pa Kòrsou TPK tin e sospecho ku di e forma aki Gobièrnu a tuma parlamento hasi.

 

Te awe parlamento i pueblo ke sa kiko tabata e motibu ku na e momentu ku ‘Riot team’ a disidí di aktua, a hasi esaki i si na e momentu ei ahinda tabata nesesario.  Tambe parlamento i pueblo ke sa si polis a tuma e prekoushonnan nesesario adelantá riba e dia ei, mirando ku ta un kaminata basta largu e manifestantenan a kana prome ku nan a yega Punda.

Meta di e enkuesta parlamentario aki ta pa sa si polis a prepara sufisiente na momentu ku e manifestashon a kuminsa, pa yega na e bèrdat rondó di e aktuashon di ‘Riot team’, pero tambe pa sa dikon hefe di Kuerpo a pone su funshon na disposishon. Sa ken a duna òrdu den liña hierárgiko na ‘Riot team’ i si e sekuensia tabata korekto i si aktuashon di ‘Riot team’ a kana konforme prosedura i nos leinan i si na momentu ku Riot team a aktua ahinda esaki tabata nesesario. Na final tambe pa saka señansa for di e situashon i garantisá aktuashon polisial profeshonal si dado kaso algu asina presentá otro biaha.

 

Pa mas informashon por tuma kontakto ku parlamentario i a la bes líder polítiko pa Trabou Pa Korsou TPK, sr. Rennox Calmes na 528-4858.

This site uses Akismet to reduce spam. Learn how your comment data is processed.

%d bloggers like this: