Minister Dangui Oduber A duna un presentacionna riba proyectonan di Baby Beach y Rodgers Beach

Minister Dangui Oduber

A duna un presentacionna riba proyectonan di Baby Beach y Rodgers Beach

ORANJESTAD – Diahuebs mainta Minister di Turismo y Salud Publico Sr. Dangui Oduber tabata presente na Nicolas store na San Nicolas. Aki e mandatario a duna un presentacion amplio na gremionan, entre otro San Nicolas Business Association (SNBA) riba e proyectonan di Baby Beach fase 2 y Rodgers Beach cu ta un plan integral cu yama Masterplan Seroe Colorado.

E proyectonan aki ta bay eleva henter e area rond di e dos playanan aki teniendo na cuenta cu nos naturalesa creando asina un desaroyo di embeyesimento di e area na un manera sostenibel y segun nos ley di ROPV. E fondonan cu lo wordo uza pa haci e proyectonan aki ta bin di etre otro Aruba Tourism Authority (ATA), Tourism Product Enhancement Fund (TPEF) y Gobierno, asina minister oduber a trece dilanti.

E proyecto di Baby Beach fase 1 ya caba a keda entrega aña pasa y awor ta den preparacion pa e comienso fase 2 di e proyecto aki. E fase 2 di proyecto di Baby beach ta planea pa termina e aña aki y dentro di poco lo tuma lugar e parti di destaho publico di e proyecto aki. Den fase 2 di e proyecto lo bay hala e “turtle wall” di e beach mas atras pa di e manera aki amplia e beach, poniendo mas santo blanco.

Otro proyecto cu ta finalisando mas tarda fin di mei ta e proyecto di renobacion di e trapi na Rodgers Beach. E trapi aki ta un punto di acceso hopi importante pa Rodgers Beach mirando tur e cambionan cu henter e area aki lo bay conoce ora cu e proyecto keda finalisa.

Rodgers Beach lo bay haya un area di parkeo completamente nobo mescos ta e caso pa Baby Beach tambe. Tur dos area lo bay haya facilidadnan caminda hende por bay cumpra cuminda y/of bebida y tambe lo tin bañonan publico pa tur bishitante. Ta bay bin facilidadnan caminda por practica “beach sport” manera beach tennis y beach volleyball.

Minister Oduber a crea un comision di proyecto infrastructural di turismo cu ta keda lidera pa Ministerio di Turismo. E comision aki lo bay traha mas di serca cu DIP y DOW pa asina e maneho cu a keda crea pa cu e beach nan wordo implementa. E desaroyo aki ta uno sostenibel. Pesey a dicidi tambe cu den e proyecto aki lo bay planta hopi palma di coco pa crea sombra pa asina limita e contruccion di palapa ariba e beach.

Turismo ta e driver di nos economia y pesei su desaroyo ta keda un prioridad. E gobierno aki ta para pa turismo di calidad, e turista cu ta bin pa gasta placa y contrubui na nos economia. Pa e motibo aki ta bay bin cu un boutique hotel di 40 camber den e area aki segun e mandatario.

Ta hopi importante pa sigui inverti den e poducto Aruba. E proyectonan aki ta bay trece mas actividad economico pa San Nicolas. Minister Oduber tin un compromiso cu San Nicolas bisando cu San Nicolas tin tur e potencial pa haya su fair share den e desaroyo di pais Aruba.