ARUBAHUIS TA CONOCE UN DIRECTORA AD INTERIM PA 3 LUNA MIENTRAS TA HABRI PROCESO DI SELECCION PA UN DIRECTOR NOBO DI ARUBAHUIS

Ya pa algun siman caba, Arubahuis ta sin director. Gobierno di Aruba pa e motibo aki a dicidi pa apunta un persona cu tin experiencia den maneha Departamentonan di Gobierno pa structura e organisacion di Arubahuis.

 

Señora Glenda Hernandez, kende recientemente a termina su contract di trabou na Aruba pa bay establece bek na Hulanda, a keda apunta den e cuadro aki, mirando e experiencia y conocemento cu señora Hernandez tin den maneho di departamentonan di Gobierno na Aruba.

 

Señora Hernandez a wordo pidi pa restructura e organisacion Arubahuis pa 3 luna. Den e periodo aki, Arubahuis lo muda y e proceso pa haya un director nobo lo encamina den e periodo aki tambe. E procedura di ‘werving en selectie’ lo cuminsa pronto y lo publica un anuncio pa esnan interesa den e posicion aki na Hulanda, por solicita.

 

E funccion di Arubahuis na Hulanda ta sumamente crucial especialemente pa diplomacia, pa e relacion entre Aruba cu Hulanda. Y den e cuadro di urgencia, y a base di investigacionnan di Centrale Accountantsdienst cu tawata andando, a scoge pa manda un persona cu tin amplio experiencia y conocemento con ta maneha departamentonan di Gobierno cu un tarea specifico pa structura e organisacion.

 

Gobierno ta spera cu pronto e procedura pa yega na un director nobo por wordo anuncia den medio di comunicacion y tambe ta spera cu tin suficiente interes pa yega na un bon director pa Arubahuis.

Share this page to Telegram

This site uses Akismet to reduce spam. Learn how your comment data is processed.

%d bloggers like this: