“2022 JCI Conference of America”

“2022 JCI Conference of America”

 

JCI Willemstad i JCI Dutch Caribbean por mira bèk riba un konferensia “JCI Conference of America 2022” eksitoso. E konferensia ku a tuma lugá aki na Kòrsou di 18 te 22 di mei último na World Trade Center, a konta ku partisipashon di alrededor di 300 lider hóben i senadornan di 30 diferente pais.

 

Na e anochi di apertura, a hiba palabra entre otro Promé Minister di Kòrsou señor Gilmar Pisas, Presidente mundial di JCI, senador Argenis Angulo, Vice Presidente ehekutivo di JCI enkargá ku e Area di Amérika (Sur, Norte i Canada) i Karibe, senador Alejandra Castillo i Presidente di e komishon organisadó, senador Shaneida Alcendor.

 

Durante oranan di dia e partisipantenan a partisipá na e diferente reunionnan ofisial, kursonan di liderazgo i tayernan rekreativo. Durante oranan di anochi delegadonan a asistí na aktividatnan sosial manera e asina yamá “Global Village” na Mathey Werf, kaminda kada pais por a presentá nan kultura na diferente manera, ku kuminda, kos dushi, bebida i artefaktonan típiko. Esaki tur aña ta un anochi hopi gusta! Partisipantenan a gosa tambe di “Curaçao Night” na Landhuis Chobolobo kaminda nan por a haña ‘tour’ den e destilería di likùr, gosa di un tremendo fiesta i algun plato típiko di Kòrsou. E último anochi tabatin e seremonia di klousura kaminda a duna premio na e personanan ku a destaká den kompetensia di debate i spich, tambe a premia miembronan, organisashonnan i proyektonan ku a sobresalí den e área di Amérika i Karibe. Na final di e bunita konferensia a pasa e bandera di JCI pa organisashon nashonal di Colombia, en bista ku na 2023 e konferensia lo tuma lugá na Santa Marta, Colombia.

 

Aparte di a asistí na e eventonan menshoná, e delegadonan a probechá di e oportunidat pa eksplorá nos dushi Kòrsou i bai bèk nan pais ku rekuerdonan bunita di eksperensianan di nos dushi isla di Kòrsou. Medionan sosial di por lo ménos 30 diferente pais ta dòrna ku potrètnan di nos dushi isla i nòmber di Kòrsou sigur lo keda rekordá den e próksimo añanan, pues un gran promoshon turístiko pa Kòrsou.

 

JCI Willemstad i JCI Dutch Caribbean ta yama danki na e tim organisadó ku tabata bou di presidensia di Shaneida Alcendor. Danki na Presidente Mundial Argenis Angulo, Vice Presidente ehekutivo Alejandra Castillo, direktiva di JCI i delegadonan pa a konfia JCI Willemstad i JCI Dutch Caribbean ku organisashon di e promé konferensia presensial despues di 2 aña. Tambe gradisimentu ta bai na tur partnernan ku a kontribuí i hasi e konferensia aki posibel, espesialmente Curaçao Tourist Board, Bureau Telecommunicatie en Post, MCB, FLOW, Algemeen Pensioenfonds van Curaçao, Curaçao Airport Holding, Curaçao Ports Authority, Selikor, Softweb Creations, Landhuis Chobolobo, Curinde, Korpodeko, Samsom, Cafe Barista, Deurwaarderskantoor Ramazan, Fantasy Arts, C3 Critical Communication Caribe i Lab de Med. Por último, danki na pueblo di Kòrsou kompletu ku a kontribuí pa demostrá nos bishitantenan ku Kòrsou ta dushi di bèrdat!

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: