RDK TA KUMINSA NEGOSHA KU CARIBBEAN PETROLEUM REFINERY PA MANEHÁ I OPERÁ NOS FASILIDATNAN PETROLERO

Willemstad 20 di Yuni 2022 – Caribbean Petroleum Refinery a keda aprobá dor di akshonista di Refineria di Kòrsou (RdK) komo e kompania ku RdK lo sigui hiba negosashon kuné ku e meta pa yega na un akuerdo pa maneho i operashon di e fasilidatnan petrolero di Kòrsou. Un komishon negoshadó lo keda instala pa Gobièrnu i RdK awor pa hiba e negosashon ku e meta finalisa e negosashonnan  i yega na un akuerdo pa 1 di Sèptèmber proksimo.

Caribbean Petroleum Refinery

Caribbean Petroleum Refinery ta un konsorsio di seis kompania Merikano i un di Brasil.

E konsorsio aki tin aliansa stratégiko ku algun kompania petrolero i di gas grandi. Caribbean Petroleum Refinery ta aspirá un periodo di lease di 30 aña mas 10 aña adishonal. Nan proyekshon ta un invershon di no menos ku US$ 650 mion den e promé 3 aña pa drecha nos fasilidatnan i trabou di revishon pa asina por start na un forma sigur. Esaki lo duna trabou na aproksimadamente 2000 trahadó di kontratista.

Caribbean Petroleum Refinery ta premirá operashon di e refineria i terminal ku mas di 800 kupo di trabou direkto. Nos refineria lo bai over pa operá riba gas pa asina kumpli ku normanan di medio ambiente.  E terminal na Bullenbaai lo keda pone den operashon mesora.  Mas alew ta importante bisa ku lo habri bèk skol di fishi (bedrijf school) i komo parti di nan ser suidadano korporativo ta kompromete pa invertí den deporte i skolnan riba nos isla.

E proseso di selekshon

Fin di aña pasá RdK a instalá un komishon enkargá ku e búskeda pa un operadó pa nos fasilidatnan petrolero. Na inisio di e trayektorio e komishon a pidi un asina yamá ‘Expression of Interest’ di kompanianan ku por tabata serio interesá den maneho i operashon di nos fasilidatnan petrolero.

E meta tabata pa no mas tardá ku fin di Febrüari risibí di partidonan selektá un ‘Binding Proposal’.

 

For di 53 kompanianan ku a mustra interes pa manehá i operá nos fasilidatnan petrolero, e komishon a hasi un selekshon di kompanianan ku por a kontinuá den e proseso pa yega na un partner. E kompanianan ku a keda selektá por a hasi nan evaluashon preliminar, dor di entre otro hasi uso di informashonnan inkluí den e dokumentu inisial ‘Teaser’ ku nan a risibí huntu ku un pakete di informashon tokante di e fasilidatnan. E kompanianan a haña akseso tambe na e data-room virtual di RdK kaminda nan por a optené informashon i datonan adishonal tokante di nos fasilidatnan petrolero. Durante varios siman a tuma lugá bishitanan di representantenan di kompanianan na nos refineria i terminal na Bullenbaai ya asina nan por hasi nan asina yama “Due Dilligence.” Durante di e bishitanan aki, Gerensha di Refineria i e komishon enkargá ku e búskeda pa un operadó pa nos fasilidatnan petrolero tambe a tene presentashon tokante di entre otro operashon i mantenshon di e refineria, rekurso humano, komersio, finansas i tokante regulashon di medio ambiente.

Na fin di Febrüari último, RdK a hala e fecha pa entregá un proposishon final i fiho pa fin di Mart.  RdK a hasi esaki riba petishon di algun di e kompanianan ku tabata hasi nan estudionan pa por a entregá nan proposishon.  No menos ku 3 kompania a entregá nan oferta definitivo pa maneho i operashon di nos fasilidatnan petrolero ora nan a entregá nan asina yamá ‘Binding Proposal’ na RdK. E tim di RdK, enkargá ku e búskeda i selekshon di un partner stratégiko pa nos fasilidatnan petrolero a sigui rápidamente ku e trabounan pa evaluá e ofertanan ku a drenta pa direktamente despues presentá e resultado di e evaluashon na Direktor di RdK, Hunta di Komisario i Akshonista di RdK.

Siman pasa a risibi tur aprobashon formal pa selektá Caribbean Petroleum Refinery komo e prefered bidder i pa siguí ku e fase di negosashon.

Negosashon

For di e siman aki e tim negoshadó di Gobièrnu i RdK lo bai mesa ku Caribbean Petroleum Refinery pa negoshá.  Akuerdonan, asina yama “Ancillary Agreement”, ta keda negoshá i sera separadamente ku Curoil, Aqualectra, KTK i Selikor.

E meta stipulá ta keda pa yega na un akuerdo no mas tardá ku promé di Sèptèmber proksimo pa mesora despues kuminsa start operashon  di e fasilidatnan petrolero di Kòrsou.