PROMÉ MINISTER GILMAR PISAS A REUNÍ KU TIM DI MANEHO DI CRU

 

 

Willemstad – Promé Minister Gilmar Pisas, huntu ku Minister di Enseñansa, Siensia, Kultura i Deporte Sithree van Heydoorn i Minister di Desaroyo Sosial, Labor i Bienestar Ruthmilda Larmonie-Cecilia, a reuní ku e Tim di Maneho di CRU resientemente.

 

E Tim di Maneho di CRU tabata konsistí di srs. Michael Doran (CRU Operations Coordinator), Gershwin Mutueel (CRU Civil Coordinator), Aubert Wiels (CRU Mechanical Coordinator) i Benjamino Goeloe (CRU HR Manager). E Tim tabata kompañá pa sr. Patrick Newton (Direktor RdK).

 

Durantedi e reunion e Tim di Maneho di CRU a duna un presentashon na e ministernan den kual a duna un splikashon amplio riba e proseso di registrashon pa por garantisá ku mas yu di Kòrsou ta na trabou. Pronto lo bolbe habri nos industria petrolero i a kuminsá registrá i prepará esnan ku por traha e tipo di fishinan ku ta bai tin mester den nos Refineria. 

A splika ku banda ku por a registrá na Man-Camp na Refineria por a registrá tambe via di un Bùs di registrashon ku a bishitá diferente bario na Kòrsou.

 

E proseso ta konta ku 4 fase:

  1. Inventario di profeshonalnan ku ta disponibel (den e áreanan di trabou identifiká);
  2. Evaluá kiko tin na kantidat i kapasidat (ta traha aserkamento pa inkorporá den trabou);
  3. Prepará trahadonan via Vocational School (prepará pa re-sertifiká i entrená);
  4. Duna empleo via di Kontratistanan lokal (personanan di fishi ta keda empleá pa Kontratistanan).

 

Pues ta re-entrená trahadonan pa hasi multiple fishi i tambe prepará i enkurashá hóbennan di skol pa fishi entre otro.

 

Tin 9 área di trabou kardinal (Mechanical, Civic, Operations, Geneal, Electrical, Cooling, Transport & Heavy EQ, ICT, i Instrumentations) i bou di esakinan tin un total di mas ku 96 fishi disponibel. 

A kolektá informashon di masomenos 3132 di esnan ku a apliká i despues di revishon a sobra 2761. Di esakinan 12 % ta trata di e ser femenino i 88% di e ser maskulino.

 

E ministernan a keda impreshoná ku e presentashon i tabata kontentu di mira kon positivo tur kos ta kanando.

Promé Minister sr. Pisas a gradisí e Tim di CRU pa tur informashon ku a keda kompartí ku e ministernan.

Share this page to Telegram

This site uses Akismet to reduce spam. Learn how your comment data is processed.

%d bloggers like this: