FFK KU TRAYEKTO PA YEGA NA DIGITILISASHON!

FFK KU TRAYEKTO PA YEGA NA DIGITILISASHON!

 

 

For di aña 2019 FFK a enkaminá diferente trayekto di digitalisashon. No solamente FFK ta sigui desaroyá su mes pero tambe digitalisashon ta parti di e eksigensianan di FIFA pa tur federashon.

Aktualmente FFK ta hasiendo uso di 2 sistema digital esta; FCMS i FFK Connect.

 

Dia 27 di mart último FFK a implementá e sistema nobo yamá FCMS. FCMS ta e sistema digital pa kompetensianan lokal ku ta hasi posibel pa klupnan por tin akseso na tur informashon general di e kompetensia manera; planiya digital, skema, tabla di posishon i registrashon di karchinan. Pues esaki ta fasilitá e atministrashon di nos ekiponan i ta duna nan akseso na tur informashon di un partido ora esaki finalisá.

 

FFK a skohe pa implemetá FCMS pa di Liga MCB Promé Divishon ku a fungi komo e grupo piloto pa e sistema aki. Despues di diferente seshon di informashon ku FFK a pone pa e klupnan di Liga MCB Promé Divishon, nos a finalisá e promé fase pa nan i lo kuminsá ku preparashon pa Liga MCB Segunda i Terser Divishon, Kampionato Hubenil i Kampionato Femenino tambe pasa pa e sistema digital FCMS.

 

Aparte di pone informashon disponibel pa tur klup, FFK den su afan pa sigui traha na bienestar di futbòl lokal, a logra pa konektá e sistema aki ku nos ‘website’ i awor tur informashon den FCMS ta pasa dirèkt riba nos ‘website’ ku ta; http://www.ffk.cw. Pues tur fanátiko i nos siguidónan por bishitá nos ‘site’ i keda na altura di tur informashon aktualisá di Liga MCB Promé Divishon.

 

E segundo sistema di digitalisashon ku FFK ta hasiendo uso di dje ta; FFK Connect. E trayekto aki tin algun tempu kaba ku FFK a kuminsá ku su implementashon i aktualmente mas ku 90% di nos miembronan ta registrá den e sistema aki. FFK Connect ta un sistema pa registrá tur dato di nos hungadó i entrenadó di nos ekiponan. Awor, tur hungadó ta konta ku un ‘FIFA ID’ ku ta un number úniko ku tur hungadó ta haña ku por keda usá rònt mundu i ta fasilitá e proseso di traspaso inernashonal. Tur inskripshon i traspaso lokal tambe ta tuma lugá via FFK Connect huntu ku e trahamentu di karnèt pa tur nos miembronan. Ámbos trayekto a tuma lugá bou di guia di Sra. Fabi Constansia, miembro di direktiva di FFK. E siguiente paso ta e implementashon di TMS i DTMS serka nos klupnana lokal, ku ta e sistemanan ku ta keda usa pa prosesá transferensianan lokal i internashonal di nos miembronan.

Pues tiki tiki pero sigur nos ta pasa pa digitalisashon i hasi menos uso di papel i dokumentonan manera tabata e kaso den pasado.

 

FFK ta sigui kontribuí na desaroyo i engrandesementu di futbòl tantu riba nivel lokal i internashonal.

 

22 sèptèmber 2022

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: