Temporada di Orkan 2022 Alerta i akshon trempan

Tur aña Servisio Meteorológiko Kòrsou ta para ketu na komienso di temporada di orkan pa nos region, pa informá i konsientisá públiko relashoná ku e impaktonan di orkan. E temporada di orkan ta kuminsá 1mé di yüni i lo terminá 30 di novèmber. Den e lunanan aki por spera formashon di siklon tropikal den region di Osean Atlántiko, Laman Karibe i Golfo di México. Naturalmente, mirando ku ta trata di fenómenonan di naturalesa, e sistemanan aki tambe por desaroyá sea promé òf despues di e lunanan menshoná.

Na mayoria okashon un siklon tropikal ta forma for di un ola tropikal ku ta subi Osean Atlántiko for di Afrika, òf for di un disturbio den atmósfera den nos área. Segun e sistemanan aki sigui desaroyá, un depreshon tropikal por wòrdu generá i e lo risibí un number na momentu ku e bientunan kuminsá supla rònt di un sentro di preshon abou. Ora ku bientu sigui oumentá (te mas ku 34 nudo) e sistema lo wòrdu klasifiká komo un tormenta tropikal i lo risibí un nòmber. Ora e tormenta tropikal su forsa di bientu sigui oumentá (mas ku 64 nudo) e lo wòrdu kategorisá komo un orkan. Faktornan ku ta di importansia pa e formashon ta un laman ku lo ta relativamente kalor den Osean Atlántiko, Laman Karibe òf Golfo di México i a la bes bientunan mester ta suak na nivelnan haltu.

E tres efektonan di un siklon tropikal ta bientu duru, áwaseru torensial i laman hopi brutu, tur tres durante di vários ora. (1) Bientu duru por ranka kita dak di kas, basha palu abou, ophetonan por wòrdu lansá i bentá riba kas i outonan. (2) Áwaseru torensial por kousa inundashon ku ta pone ku kasnan i kamindanan por inundá. (3) Laman brutu por kibra pirnan i botonan ku ta mará, pero tambe laman por subi tera i kousa inundashon na hotèlnan òf kasnan pegá ku kosta. Ta bon pa indiká ku no nesesariamente tur tres efekto lo afektá nos isla na mes momentu. Tormenta Tropikal Joan (1988) su efektonan prinsipal na Kòrsou tabata bientu fuerte, Orkan Lenny (1999), Tormenta Tropikal Omar (2008) i Orkan Matthew (2016) a impaktá Kòrsou ku laman brutu, Orkan Ivan (2004) i Tormenta Tropikal Tomás (2010) ku áwaseru torensial na respektivamente Aruba i Kòrsou.

E aña aki Servisio Meteorológiko ke enfoká riba e tema di “alerta i akshon trempan.” Alerta trempan ta enserá informashon di e menasa i e posibel impakto ku e lo bai tin pa sierto áreanan i tambe e medidanan di prekoushon ku lo mester wòrdu tumá. Akshon trempan ta e kantidat di akshon realisá promé ku e peliger bira inminente. Den e kuadro aki lo por midi mihó kon e rekomendashonnan ta wòrdu ehekutá. Esaki lo tin komo bentaha ku bida i propiedat lo wòrdu skapá òf salbá mas tantu ainda.

Esakinan ta algun punto di preparashon:

Medida preventivo pa ku bientu:

Sea konsiente di e kondishon di bo kas; inspektá bo dak i, si ta nesesario, refors’é; kòrta brasa di palu i mata pegá ku dak, rònt di kas i limpia bo kurá, ya ku ophetonan lòs por kousa daño na bo kas òf esun di bo bisiña.