Bokseo djasabra den Sambil Arena

Keiber Gonzalez (18-0,17KO) vs José Aviles Di Perú..

…Mainbout…

Foto: Keiber Gonzalez, den representashon di Venezuela i Korsou, invikto den 18 kombate di kual 16 e la gana pa via rápido.

Foto: José Aviles di Peru, un bòksdó di trayektoria Internashonal.

WILLEMSTAD- Preparashonnan ta adelantando pa nos haña djasabra awor 29 di aprel den Sambil Arena tremendo kartelera di bòkseo profeshonal/amatùr organisá pa “Supreme Boxing Center” i Cura-Box. E kombate prinsipal dje kartelera lo bai entre e bòksdó Venezolano bibá na Kòrsou Keiber Gonzalez i e bòksdó di Peru José Aviles. E kombate aki lo ta di 8 asalto di 3 minut i 1 di sosiegu den e kategoria mediano di 160 liber. Keiber Gonzalez ta konosí den bòkseo profeshonal komo “Zapata” o “Peligro”. E ta un bòksdó di un trayektoria impreshonante amatùr i invikto den profeshonal ku rekòrt di 18-0, ku 16 nòkout. E ta train na Supreme Boxing Center. E rival di Keiber Gonzalez lo ta e bòksdó di Peru José Aviles. Aviles tambe tabatin un ekselente trayektoria amatùr. I e la bringa vários rival di kategoria den bòkseo profeshonal. Sin duda lo ta un kombate ku amantenan di bòkseo lo gusta. E kartelera lo kuminsá 6or di atardi, i lo finalisá 10or di anochi. Preis pa entrada general lo ta: 35 florin. VIP ta kosta 5o heldu, i VIP-Plus ta 75 florin. Mucha ta paga 10 florin. Kualke informashon por bel: 527-6308.

 

Djasabra awor den Sambil Arena:

Flavia Figueiredo vs Atheyna Bylol III…

Foto: Flavia Figueiredo.

Foto: Atheyna Bylol.

WILLEMSTAD- Sin duda un dje atrakshonnan prinsipal dje programa di bòkseo di djasabra awor organisá pa Supreme Boxing i Cura-Box lo bai entre Flavia Fiqueiredo di Brazil i Atheyna Bylol di Panamá. Ta di tres biaha ku e dos mucha muhénan aki ta topa ku otro. Kada un a gana na un okashon, i djasabra awor lo mester determiná kua di nan dos ta superior. Figueiredo i Bylol ta bringa den e kategoria di 75 kilo. Flavia Figueiredo ta un sargento di ehérsito di Brazil, i kampeon den su kategoria. E la kuminsá ku bòkseo ku 18 aña debí ku su Tata ta un gran amante dje deporte di ring. Na 5 okashon e la sa di bira kampeon di su Pais. E la representá Brazil den vários kompetensia regional, ganando Oro den kompetensia Sur Amerikano, i Bròns den Panamerikano. Su soño ta di representá su Pais den Olimpiada di Paris na 2024. Atheyna Bylol ta polis di profeshon na Panamá. E tabata e deportista Panameño ku na Olimpiada di Tokio 2020 tabatin e honor di a karga nan bandera den e desfile inougural. Na 2022 e la korona sumes komo sub kampeon mundial. Su ophetivo ta di gana medaya den Olimpiada di Paris na 2024. E kombate entre Flavia Firueiredo i Atheyna Bylol lo ta di 3 asalto di 3 minüt i 1 di sosiegu. Entrada pa e kategoria di djasabra awor na Sambil Arena lo ta di 75 florin pa VIP-Plus, 50 florin pa VIP, entrada general ta: 35 florin. I mucha bou di 12 aña ta paga 10 heldu. Tur amante di bòkseo ta kordialmente invita.