TARIFA DI ELEKTRISIDAT I AWA TA BAHA, KAMBIO DI TARIFA DI PRODUKTONAN KOMBUSTIBEL PROLONGA.

WILLEMSTAD – Entrante djaluna 1 di mei 2023 e tarifa di elektrisidat i awa ta baha. Pa loke ta
trata e produktonan di kombustibel, e tarifanan aktual ta keda vigente te próksimo aviso.
Esaki Bureau Telecommunicatie en Post (BT&P) ta partisipá den su komunikado mensual riba e
partikularidat aki. BT&P ta supervisá e desaroyo di preis di produktonan petrolero i di utilidat.
Kálkulo tarifa awa i koriente
E kálkulo di e tarifa pa awa i elektrisidat tin dos komponente: e tarifa básiko i e klousula di
kombustibel. E klousula di kombustibel pa elektrisidat ta konsistí di dos elemento: kompra di
koriente i gastunan di kombustibel.
E ‘kompra di koriente’ ta basá riba e preis pa e energia ku tersernan ta suministrá, manera energia
di bientu i di solo. ‘Gastunan di kombustibel’ ta enserá produkshon di energia dor di Aqualectra
mes.
Tambe e klousula di kombustibel pa awa ta konsistí di dos elementu, ku ta “kompra” basá riba
preis di awa ku ta wòrdu suministrá dor di un terser partido i e gastunan di elektrisidat pa
produkshon di awa dor di Aqualectra mes.
Sin embargo, kada luna e uso di e diferente medio pa produkshon – e asina yamá ‘meskla di
produkshon’ ta varia. P’esei BT&P ta determiná e balor di e klousula di kombustibel
mensualmente basá riba e pronóstiko di Aqualectra, di kiko e meskla di produkshon lo bira, den e
kaso aki pa e luna di mei 2023. Si un luna despues resultá ku e elemento akí tabata muchu haltu òf
muchu abou, ta korigí esaki. Den e kaso akí, ta trata di e luna di mart 2023.
BT&P ta determiná e tarifa básiko pa tantu awa komo elektrisidat un biaha pa aña. E tarifa akí ta
enserá tur otro gastu (fiho) pa e produkshon di awa i elektrisidat i tambe e gastunan pa e
distribushon i e entrega di esakinan, manera gastu di personal, di mantenshon, depresiashon, etc.
E bahada di e tarifanan pa elektrisidat ta resultado di un promedio mas abou di kostonan di
kombustibel pa produkson di elektrisidat pa motibu di un bahada di preisnan di kombustibel den
kombinashon ku e produkshon-miksto sperá (bou di kua un parti algu mas haltu di energia di
bientu i un entonashon di instalashonnan di produkshon mas barata) i un faktor di korekshon mas
abou ofer di mart 2023. E bahada di tarifanan di awa ta resultado di kostonan di elektrisidat mas
abou pa produkshon di awa i un algu mas haltu di faktor di korekshon ofer di mart 2023.
Aprobashon i fihamentu
BT&P ta asesorá Konseho di Minister (KdM) enkuanto e tarifanan nobo. Solamente despues ku e
KdM aprobá e propuesta, e Minister pa Desaroyo Ekonómiko, ku a la bes ta enkargá ku asuntunan
di energia, ta fiha e tarifanan. Eseinan ta e tarifanan máksimo ku por usa un luna largu.
Ku e prosedura akí, ku ta konsiderá faktornan internashonal i lokal, e supervisor BT&P ta vigilá e
entrega di kombustibel, awa i elektrisidat na e poblashon lokal di forma independiente i
transparente, pa esaki ta kontínuo i rasonabel.
Por mira e ahustenan eksakto den e tarifanan riba http://www.btnp.org.

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: