A presentá proyekto bèrdè grandi pa Kòrsou

Durante sena komersial di Kámara di Komèrsio

A presentá proyekto bèrdè grandi pa Kòrsou

 

Produkshon di kombustibel biológiko ku mas di mil mion na invershon

 

Willemstad – Resientemente Kámara di Komèrsio i Industria di Kòrsou a tene su sena anual den Renaissance Hotel Curaçao. Durante e sena, kaminda a asistí mas ku 140 empresario i komersiante i tambe empresanan ku ta sostené aktividatnan di rafinahe na nos isla i wéspetnan prominente manera e ministernan señora L. Larmonie-Cecilia, señor O. Martina, señor S. Hato i miembronan di parlamento, presidente di Kámara di Komèrsio i Industria, señor Billy Jonckheer, a resumí e estado di ekonomia di Kòrsou i loke mester sosodé segun e organisashon pa pone ekonomia krese na un manera produktivo. Un di e puntonan ku el a trese dilanti tabata e balor di e reformanan atraves di e asina yamá ‘Landspakketten’.

 

Segun señor Jonckheer ta importante pa sa kua konteksto i kua tipo di ekonomia i kua aktividatnan ekonómiko e reformanan aki mester sirbi. Finalmente ta pa bai na un ekonomia ku puestonan di trabou bon pagá. Den e kuadro aki señor Jonckheer a mustra riba un sektor nobo ku potensial kaminda Kòrsou ta desaroyando un hurisdikshon di penshun, loke ta un konsepto duradero, masha produktivo i ademas ku tin un efekto positivo riba otro pilánan di ekonomia. Kamara di Komersio a traha un raport ku ta mustra ku un huridikshon di penshun lo ta positivo pa nos ekonomia i lo tin efekto postivo riba otro sektornan manera turismo.

 

Durante e evento aki e orador prinsipal, señor Harold McLallen, CEO di Steamboat Fuels LLC, a introdusí un proyekto di produkshon duradero i bèrdè ku ta desaroyando i ku a alkansá e fase di realisashon na Kòrsou. Den Bulbai, Steamboat Fuels lo traha un fasilidat pa produkshon di kombustibel biológiko. Señor McLallen den su presentashon a kompartí e puntonan kulminante pa e proseso di produkshon pa kombustibel biológiko, i el a splika tambe su eskoho pa Kòrsou komo sitio pa e proyekto aki.

Den su diskurso señor McLallen a profundisá riba e proseso di produkshon; e kombustibel biológiko ta bini di materia prima renobabel ku su trato previo i finalmente ta transformá esei den kombustibel renobabel. E instalashon di produkshon lo tin un kapasidat di 13 mil barí pa dia; lo rafiná e produkto na nivel di konsumidó i lo eksport’é na merkadonan relevante.

 

Segun señor McLallen, Kòrsou tin bentaha stratégiko pa e tipo di aktividatnan aki di produkshon, manera

• Disponibilidat di tereno adekuá;
• Infrastruktura marítimo ku t’ei kaba i ku por usa pa sostené un refineria;
• Personal eksperensiá pa e refineria;
• Un kuadro komersial internashonal favorabel ku ta brinda akseso na e merkado pa produktonan ku ta di orígen di Kòrsou;
• Areglo fiskal favorabel pa produkshon ku ta orientá riba eksportashon.

 

Segun señor McLallen, Steamboat Fuels lo tin un efekto ekonómiko konsiderabel pa motibu di:

• Gastunan di konstrukshon durante un periodo di 24 luna di desaroyo;
• Mas ku 1000 puesto di trabou durante konstrukshon;
• Por spera ingreso anual di mas ku 1500 mion dòler;
• Alrededor di 500 puesto direkto di trabou ‘fulltime’ pa empleadonan formá durante e proseso di eksplotashon;
• Demanda di sosten di kontratista lokal independiente ku ta fiha riba e industria di rafinahe;
• Produkshon di energia bèrdè ku lo yuda ekonomia di Kòrsou pa diversifiká, miéntras ta hasi uzo di empleadonan spesialisá den e aktividatnan tradishonal di rafinahe.

 

Ya Steamboat Fuels a risibí e pèrmit di medioambiente pa eksplotá e instalashon pa e trato previo i e ta andando bon ku e pèrmitnan pa e refineria ku lo ekspandé e produkshon duradero di Kòrsou.