Delegashon di Parlamento di Kòrsou ta partisipá na e Reunionnan Interparlamentario, IPKO, ku lo tuma lugá di 1 pa 5 di yüni 2023 na Den Haag.

 

Delegashon di Parlamento di Kòrsou ta partisipá na e Reunionnan Interparlamentario, IPKO, ku lo tuma lugá di 1 pa 5 di yüni 2023 na Den Haag.

 

Willemstad, …. mei 2023, Delegashon di Parlamento di Kòrsou ta partisipá na e Reunionnan Interparlamentario, IPKO, ku o tuma lugá di 1 pa 5 di yüni 2023 na Den Haag na Hulanda.

Durante IPKO, e delegashonnan di Parlamentonan di Kòrsou, Hulanda, Aruba i Sint Maarten ta reuní ku otro i interkambiá informashon i puntonan di bista riba vários tópiko ku ta konserní e diferente paisnan den Reino.

 

Pa kada IPKO ta determiná e programa ku temanan adelantá ku lo trata durante e reunionnan. E siguiente tópikonan lo keda tratá pa e IPKO binidero:

• seguridat di data;
• pasado di sklabitut i kolonialismo;
• klima i energia duradero;
• enseñansa: problemanan ku studiantenan karibense ta enkontrá;
• konferensia di Reino.

Banda di e interkambionan ku lo bai tin riba e tópikonan ariba menshoná, e delegashonnan ta pendiente pa realisá un bishita di trabou den kuadro di un di e temanan.

Algun di e tópikonan ku lo trata, ta basá riba e lista di Palabrashonnan ku e delegashonnan a bai di akuerdo kuné, durante di e IPKO ku Parlamento di Kòrsou a organisá di 28 di febrüari pa 3 di mart 2023 na Kòrsou.

 

Estando na Den Haag, e delegashon di Kòrsou lo hiba un bishita di trabou na Haagse Hogeschool anteriormente na e IPKO, riba di 30 di mei 2023. Durante e bishita e delegashon lo kombersá ku e studiantenan yu di Kòrsou ku ta siguiendo un estudio na e skol avansá aki.

 

Riba 31 di mei 2023, e delegashonnan di Kòrsou, Aruba i Sint Maarten lo reuní manera ta e kustumber den e asina yamá Tripartit, kaminda lo trata temanan ku ta toka e islanan aki so i tambe ta hasi sierto preparashonnan pa IPKO.

 

Manera semper, na final di e IPKO aki tambe, lo presentá un Lista di Palabrashonnan ku tur delegashon ta bai di akuerdo kuné.

 

E delegashon di Kòrsou ta konsistí di e siguiente miembronan:

• Sra. Charetti America-Francisca, ku ta presidente di Parlamento i alabes lider di e delegashon;
• Sr. Amerigo Thode, ku ta presidente di e komishon di Asuntunan di Reino, relashonnan interparlamentario i relashonnan eksterior i miembro di Parlamento pa frakshon di MFK;
• Sr. Sheldry Osepa, miembro di Parlamento pa frakshon di PNP;
• Sr. Quincy Girigorie, miembro di Parlamento pa frakshon di PAR;
• Sra. Giselle Mc William, miembro di Parlamento pa frakshon di MAN;
• Sr. Rennox Calmes, miembro di Parlamento pa frakshon di Trabou pa Kòrsou; i
• Sr. Michelango Martines, miembro di Parlamento pa frakshon di KEM.