Petishon pa dirigí pregunta na Minister Ruisandro Cijntje Tópiko: Stabilidat di suministro di koriente
Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 2 di yüni 2023
Tópiko: Petishon pa dirigí pregunta na Minister Ruisandro Cijntje
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Desaroyo Ekonómiko, señor Ruisandro Cijnte.
Danki pa e koperashon.
Atentamente,
Fergino Brownbill
Parlamentario pa
frakshon di MFK
Minister di Desaroyo Ekonómiko
Señor Ruisandro Cijnte
PRESENTE
Kòrsou, 2 di yüni 2023
Tópiko: Stabilidat di suministro di koriente
Apresiabel Minister Cijntje,
Suskrito a tuma nota ku dia 1 yüni último, gran parti di Kòrsou a keda sin koriente, ku komo konsekuensia ku e kasnan di famia i sektor di komersio a wòrdu afektá un biaha mas komo ku Aqualectra no por a suministrá e koriente.
Ademas esaki naturalmente den algun kaso a kousa daño na aparatonan eléktriko na kasnan di famia i tambe den e sektor di komersio.
Aqualectra a splika ku motibu ku e no por a suministrá koriente tabata pa debí ku den e parti di produkshon a surgi un defekto i ku téknikonan di Aqualectra tabata traha riba e defekto. Via di retnan sosial komunidat por a tuma nota ku e situashon pa ku suministrashon di koriente a keda delikado i Aqualectra a pidi komunidat pa hasi ménos uso di koriente.
Frakshon di MFK den parlamento a risibí hopi reklamo di molèster i daño ku e situashon ki a krea i tambe komunidat ta hopi preokupá ku e anunsio di alerta di Aqualectra pa ku e situashon delikado di koriente ta keda na vigor i ku te ainda suministro di koriente na Kòrsou no ta 100% konfiabel.
Debí na e kantidat grandi di reklamonan i tambe e preokupashon ku ta biba bou di nos komunidat i komersio pa ku e situashon di suministro di koriente na komunidat di Kòrsou en general i konforme artíkulo 96 di reglamento di órden di parlamento di Kòrsou, suskrito ta hasi e siguiente preguntanan na Minister Ruisandro Cijnte;
- Minister a tuma nota ku dia 1 di yüni gran parti di Kòrsou no por a dispone di suministro di koriente dor di Aqualectra?
- Riba retnan sosial tabatin un biaha mas hopi reklamo di komunidat riba e situashon ku a presentá, Minister a tuma nota di e reklamonan di komunidat?
- Minister por splika Parlamento kiko ta e motibu ku Aqualectra no por a suministrá komunidat kompleto koriente?
- Por indiká kuantu bario (na nòmber) a keda sin koriente i tambe pa kuantu tempu (orario)?
- Minister por fasilitá Parlamento, Minister su plan energétiko?
- Si tin un plan energétiko pa ki tempu Minister ta pensa ku komunidat por konta riba un suministro di koriente konfiabel?
- Kuantu ta e invershon nan ku a i tin ku tuma lugá den e periodo di 2020 pa 2025 pa optimalisá e ret di koriente?
- Parlamento por haña un bista pa medio di un liña di tempu, kuminsando for di 2020 te ku mei 2023 kuantu a invertí i di yüni 2023 te ku desèmber 2025 kuantu lo bai invertí?
- Aqualectra lo kubri gastunan di aparatonan eléktriko/elektróniko ku a sufri daño pa motibu di e situashon aki?
- Minister ta komprometé pa garantisá pueblo di Kòrsou un suministro di koriente konfiabel riba un término korto?
Sperando ku Minister Ruisandro Cijntje lo kontesta nos karta den e tempu definí den e protokòl firma entre di gobièrnu di Kòrsou i parlamento.
Atentamente,
Fergino Brownbill
Parlamentario pa
frakshon di MFK