Modelo di Maneho Nobo ACU Nombramentu di Hunta di Supervishon

Modelo di Maneho Nobo ACU Nombramentu di Hunta di Supervishon

WILLEMSTAD/PHILIPSBURG – Centrale Bank van Curaçao en Sint Maarten (CBCS) ta duna di
konosé ku e ta efektuando un intervenshon breve pa yega na nombramentu di un Hunta di
Supervishon pa Algemene Spaar- en Kredietcoöperatie ACU (ACU).
Na yüli di 2022, a introdusí un modelo di maneho kooperativo modernisá pa ACU. E statüt nobo,
formulá pa ACU su komishon pa kambio di statüt (Commissie Statutenwijziging) den konsulta ku
un notario i ku spesialista riba tereno di kooperativa, a drenta na vigor. Tambe, a nombra e
miembronan ku ACU a postulá pa un Komishon di Nominashon.
E Komishon di Nominashon a kumpli ku su tarea di nominá kandidato na ACU su Reunion General
di Sosio (ALV) pa esakinan ser nombrá komo miembro di ACU su Hunta di Supervishon. Un tarea
importante di e Hunta di Supervishon ta di nombra un direktiva nobo. Sin embargo, te na e
momento akí, no a nombra un Hunta di Supervishon nobo konforme e modelo di maneho nobo
di yüli 2022. Durante e ALV di 25 di yüni último, tampoko esei no a sosodé.
E intervenshon ku CBCS ta efektuando aktualmente lo hasi posibel pa e kandidatonan nominá por
keda nombrá komo miembro di e Hunta di Supervishon. ACU mes lo keda enkargá ku
implementashon di su modelo di maneho for di e momento ei padilanti, entre otro, nombramentu
di un direktiva.
Unabes ACU tin un Hunta di Supervishon i un direktiva nobo, e lo ta kla pa enfoká riba futuro, na
interes di e organisashon mes, su miembronan i su depositantenan.
Willemstad, 26 di yüni 2023
CENTRALE BANK VAN CURAÇAO EN SINT MAARTEN