BLUE NAP AMERICAS TA UNI KU KOMPANIANAN INTERNASHONAL DEN PROYEKTO TEKNOLÓGIKO DI ‘WHITE HAT’: YOUTH CYBER SAFETY BOOTCAMP 2023
BLUE NAP AMERICAS TA UNI KU KOMPANIANAN INTERNASHONAL DEN PROYEKTO TEKNOLÓGIKO DI ‘WHITE HAT’: YOUTH CYBER SAFETY BOOTCAMP 2023
Willemstad 28 di Yuni 2023-‘Mobeus’, e kompania teknológiko ku tin su ofisinanan prinsipal situá na New Jersey i ta renombrá pa nan plataforma inovativo ‘Airglass’, a uni forsa ku Blue NAP Americas (BNA), e datacenter di nivel TIER IV situá na Kòrsou i tambe ‘White Hat Technology Project’ di Sint Lucia, pa huntu organisá e di dos edishon anual di e programa ‘Youth Cyber Safety Bootcamp’.
E ‘bootcamp’ ta un programa virtual ku ta kubri un periodo di tres dia i ta dediká na introdusí personanan entre 16 pa 35 aña na e último desaroyonan den mundu teknológiko, seguridat sibernétiko i otro konseptonan ku ta krea transformashon digital. Aña pasá 75 partisipante prosedente di diferente pais Karibense kaminda e idioma prinsipal ta Ingles a partisipá na e ‘bootcamp’ i na e okashon aki a ofresé beurs na 5 partisipante pa e kurso di Introduskhon na Seguridat Sibernétiko. Un di e studiantenan, Kevin Jordan, ku aktualmente ta okupá e posishon di IT Officer na kuerpo polisial di Sint Lucia, lo sigui avansá su konosementu pa finalmente sertifiká den e area di ‘Ethical Hacking’.
E aña aki, for di djarason 23 di Ougùstùs te ku 25 di Ougùstùs, partisipantenan lo tin e oportunidat pa drenta den kontakto ku señor Richie Etwaru, ko-fundadó i Chief Creative Officer di Mobeus. E lo bai mas profundo den e fundamentunan di Inteligensha Artifisial (Artificial Intelligence) i introdusí e hobennan Karibense na e invento ‘Airglass’. Por kompará ‘Airglass’ ku e sistema ‘Vision Pro’ di Apple, pero aun mas ‘Airglass’ ta proveé un eksperensha ku no ta kompliká kaminda usuarionan por “konektá, kompartí i kolaborá ku otro” riba un manera ku ta fásil pa komprondé. “Mi ta kere apasionadamente den e propósito di inspirá hoben globalmente pa nan por gara e futuro eksitante ku inteligensha artifisial ta presentá na nos. Karibe ta para na punto di tin akseso na un oportunidat nunka bisto pa gana tereno riba otro region den e era nobo kompetitívo aki. E momentu pa ta partisipe na e transformashon aki ta awor i e ta kuminsá ku nos hubentut”, Etwaru a indiká.
Blue NAP Americas a komprometé su rekursonan pa yuda fasilitá entrenamentu den e area di ‘cryptocurrency’, o sea moneda ‘crypto’, pero tambe kurso pa servisio na sentro di data i sertifikashon pa por kontinuá un kolaborashon kaminda ta desaroyá kapasidat huntu ku e proyekto teknológiko di ‘White Hat’. Blue NAP Americas a realisá kolaborashonnan ku entidatnan renombrá manera Google, Bitlyft, Dutch Datacenter Association, Fortinet, Azure, VMWARE, VEEAM, Checkpoint, EPI i diferente otro, kual ta añadí na nan kredibilidat i ekspertisio.
Ta premirá ku otro spònser i partnernan di Sint Lucia, gran parti di Karibe i di arenanan internashonal lo kompletá e lista di e ‘Bootcamp’ ku lo tuma lugá den 2023. Personanan ku ta interesá por registrá via White Hat Registration (relocateslu.com).
