PROYEKTO PORTA KURA BUNITA TA INISIÁ OFISIALMENTE

Willemstad – Resientemente, Minister Charles Cooper tabata presente pa duna inisio na e proyekto Porta Kura Bunita. Esaki lo enserá rabounan di konstrukshon di un bunita proyekto mas ku lo nifiká un desaroyo nobo den e área di Koraal Tabak.

 

Porta Kura Bunita

Porta Kura Bunita lo ta un desaroyo duradero di un bario nobo aki na Kòrsou, kaminda lo tene debido kuenta ku e balornan ekológiko i históriko di e área, di Pais Kòrsou.

 

E kompleho lo ta un “gated community” konsistiendo di 18 bibienda i 48 apartamentu. Huntu ku tur esakinan lo tin tambe, den eplan maestro, un diversidat di bibienda i posibilidatnan di rekreo. Tambe lo tin un playa nobo, hotèlnan, un bahia pa piskadónan, horeca, pakus, kantornan, i vários otro partinan mas di rekreo hasiendo uso optimal di e espasio ku e área ta ofresé.

 

Ta un invershon di mas o ménos 35 mion florin, ku naturalmente lo krea mésora kuponan di trabou pa nos hendenan lokal.

E kompania CWM (Curaçaose Wegen Maatschappij) i Studio Acht lo ta esnan enkargá ku e trabounan.

 

Trabounan lo dura mas o ménos 3 pa 4 aña i lo generá den korto plaso al rededor di 100 kupo di trabou pa nos hendenan.

E promé bario ‘Porta kura bunita’ lo wòrdu entregá den fase for di e di 3 kuartal di aña 2024.

 

Minister Cooper na e okashon aki a yama nn danki speshal na tur ku di un òf otro forma a pone nan granito pa realisashon di e bunita proyekto aki ku ta e promé stap den e desaroyo di Koraal Tabak. Tambe el a yama danki na e desaroyadornan pa kere den Kòrsou i bin invertí aki serka nos.