A drecha diferente fasilidat pa piskadó i bishitantenan di playa

A drecha diferente fasilidat pa piskadó i bishitantenan di playa

Willemstad – Ministerio di GMN resientemente a kuminsá ku trabounan pa drecha diferente fasilidatnan pa piskadó i pa bishitantenan ku ta rekreá na playanan di Kòrsou. Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas a pone komo prioridat pa drecha i renobá fasilidatnan na vários di nos playanan na benefisio di piskadónan pero tambe turista i bishitantenan lokal di nos playanan.

Na playa Piskadó na Wèstpunt a drecha i ekspandé e mesa di kap piská. Ku esaki ta bira posibel ku mas piskadó por kap piská na mes momentu. Na playa Kenepa Chikitu ku tambe tabata rekerí atenshon a drecha un palapa ku tabata kibrá i a konstruí shete palapa mas. Ta hopi importante pa momentu ku nos hendenan pero tambe turista bishitá nos playanan, nan por hasi uzo di sufisiente fasilidat ku ta den bon estado di mantenshon.