Promé Minister sr. Gilmar Pisas a REUNÍ KU SER RIBA E KONSEPTO DI LEI “Landsverordening Luchtkwaliteit”.

Promé Minister sr. Gilmar Pisas a REUNÍ KU SER RIBA E KONSEPTO DI LEI “Landsverordening Luchtkwaliteit”.

 

Willemstad- Promé Minister sr. Gilmar Pisas, huntu ku su konseheronan di e Ministerionan di Salubridat Públiko, Medio Ambiente i Naturalesa (GMN) i  Asuntunan General (AZ), a reuní ku Konseho Sosial Ekonómiko di Kòrsou (SER) dia 25 di ougùstùs 2023.

 

Promé Minister sr. Pisas a hasi esaki den kalidat di Minister (sin kartera) pa Salubridat Públiko, Medio Ambiente i Naturalesa enkargá ku e sektor di agrikultura, medio ambiente i naturalesa.

Esaki tabata un invitashon di SER den kuadro di reunion preparativo ekstraordinario i plenario pa prepará pa e reunion kaminda ku SER lo bai debatí riba e konsepto di lei ku lo introdusí normanan pa kalidat di airu (concept Landsverordening Luchtkwaliteit).

 

Durante di e reunion  e ekspertonan di ámbos ministerio a duna un presentashon na e miembronan di SER tokante di e teksto di e konsepto di lei i  mediondie deliberashonnan ku a tuma lugá a logra pa trese klaridat riba preguntanan di SER. Esaki lo yuda SER pa hasi su trabou mas efektivo ora ku ta bai trata e konsepto di lei den su seno.

Ámbos partido a keda satisfecho ku e reunion i a yega na palabrashonnan kon e proseso lo sigui kana.

 

Promé Ministter sr. Pisas ta satisfecho pa motibu ku esaki tambe ta un paso mas den e direkshon korekto kaminda ku Gobièrnu di Kòrsou ta kumpli ku loke nos Areglo di Estado i otro leinan ta preskribí kaba.

Kual ta asumí e responsabilidat komo Gobièrnu pa sòru pa nos por biba den nos País, protehá nos naturalesa i protehá e ambiente di bida, i alabes ta garantisá ku ta salbaguardiá e salubridat públiko.