Promé Minister Gilmar Pisas a risibí e hefe di e delegashon di union europeo na guyana.

Promé Minister Gilmar Pisas a risibí e hefe di e delegashon di union europeo na guyana.

 

Willemstad – Promé Minister sr. Gilmar Pisas a rísibí e hefe di e delegashon di Union Europeo di Guyana sr. Rene van Nes dia 1 di sèptèmber 2023.

 

Esaki tabata un bishita di kortesia pa sr. Van Nes por a sera konosí ku Promé Minister sr. Pisas i alabes elaborá riba e diferente proyektonan ku ta keda finansiá pa Union Europeo na Kòrsou.

 

Durante di e kombersashon na Fòrti a elaborá riba e struktura ku aktualmente tin na Kòrsou ku ta atendé ku e parti di fondonan for di Union Europeo (Ministerio di Asuntunan General pa ku fondonan di EDF  i  Ministerio di Desaroyo Ekonómiko pa ku e fondonan non-EDF), proyektonan ku a finalisá (10e EOF), pero tambe riba proyektonan ku ta preparando den futuro (11e EOF).

 

A elaborá tambe riba e programa di DOAG (decision overseas association including Greenland), e fasilidatnan di TAIEX ((Technical Assistance and Information Exchange instrument of the European Commission), i tambe riba e struktura di komunikashon ku lo bai hiba ku e hefe di e delegashon di Union Europeo, pa asina fortifiká e koperashon aun mas i pa Kòrsou por yega na mas informashon riba e diferente fondonan ku ta disponibel pa medio di Union Europeo.

 

Despues di e kombersashon a sigui ku un rekorido kaminda a bai pone un plakat den kuater bario na Kòrsou, kaminda a hasi uso di e fondonan di Union Europeo pa diferente proyekto. Ta trata aki di e barionan di Nieuw Nederland, Sapaté, Kortijn i Tera Kòrá.

 

Sr. Van Nes a keda satisfecho ku e kombersashon i alabes e ponementu di e plakatnan kaminda ta duna rekonosementu na e sosten di parti Union Europeo.

Promé Minister sr. Pisas tambe a keda hopi satisfecho ku e bishita di sr. Rene van Nes.