Preguntanan relashoná ku e problema di ENNIA mirando nos situashon sosial aktual, e retonan ekonómiko i nos situashon presupuestario di pais Kòrsou.

September 13, 2023 REDAKSHON

Willemstad, 12 di sèptèmber 2023

Presidente di Parlamento di Kòrsou

Señora Charetti M. America-Francisca

Wilhelminaplein # 4

Presente

Señora Presidente,

Pa medio di e karta aki, suskrito Amerigó C.M. Thodé Lider di Frakshon di Movementu Futuro Kòrsou (MFK) hasiendo uso di artíkulo 96 di Reglamentu

di Òrdu i tambe artíkulo 57 di nos Areglo di Estado, na nòmber di nos Frakshon,

ke pidi bo persona mas pronto ku ta posibel pa dirigí e karta athunto na Minister di Finansa señor mr. drs. Javier F.A. Silvania, pa preguntanan ku mi persona a hasi na e minister konserní.

Di antemano un danki pa e koperashon.

Atentamente,

_________________

Amerigó C.M. Thodé

Miembro di Parlamento

Lider di Frakshon MFK

Willemstad, 12 di sèptèmber 2023

Minister di Finansa

Señor mr. drs. Javier F.A. Silvania

Pietermaai # 44

Presente

Tópiko: Preguntanan relashoná ku e problema di ENNIA mirando nos situashon sosial aktual, e retonan ekonómiko i nos situashon presupuestario di pais Kòrsou.

Señor Minister Silvania,

Na nòmber di Frakshon di Movementu Futuro Kòrsou (MFK) pa medio di e karta aki suskrito, Amerigó C.M. Thodé, Lider di frakshon, ke pidi bo atenshon pa lo siguiente:

Ku hopi preokupashon mi ta siguiendo e diskushonnan entorno e kompania di seguro ENNIA kaminda alrededor di 30,000 siudadanonan nan penshun di behes sigurá. Mi preokupashon ta basá entre otro riba e karta fechá 18 di yüli 2023 di e sekretario di estado Alexandra van Huffelen na Tweede Kamer hulandes i e karta fechá 24 di yüli 2023 di minister presidènt señor Gilmar Pisas na ministro di finansa i sekretario di estado di Hulanda.

Manera mi a bin ta tuma nota di e vários informashonnan aki, ta indiká ku e problemátika di ENNIA lo tin reperkushonnan supstansial riba nos pais tantu soshal-ekonómiko komo presupuestario. Ta ser menshoná ku mester un montante di Euro 600 mion pa kubri e défisit di solvensia di e kompania ENNIA pa asina di un forma duradero por resolv’é e problema aki.

Huntu ku e debenan ku pais mester a hasi den kuadro di COVID-19, un fiansa adishonal di NAf 911mion florin lo representá un karga supstansial pa e presupuesto di gobièrnu manera entre otro a ser indiká dor di CFT. E situashon ta bira aún mas preokupante si tuma nota ku aparte di gastunan adishonal di interes ku e fiansanan aki ta representá pa nos presupuesto, e ta endeudá nos pais di tal forma ku e programa di invershon di mas aña ku gobièrnu a anunsiá ta kore peliger enorme ku reperkushonnan grave pa nos pais.

Mirando nos situashon sosial aktual, e retonan ekonómiko i nos situashon presupuestario mi ta kere sinseramente ku mester rekonsiderá e fórmula di solushoná e problemátika aki.

Frakshon di MFK hasiendo uso di e derecho di hasi pregunta ankrá den artíkulo 96 di Reglamentu di Órden i tambe artíkulo 57 di nos Areglo di Estado, na nòmber di nos Frakshon mi kier hasi señor Minister Silvania e siguiente preguntanan:

E krísis finansiero di ENNIA ta un fenómeno mundial? Ta un krísis ku a yega di pasa mas biaha esaki ta?
Ta for di kua aña e problemátiko di ENNIA ta hungando i kiko a sosodé for di dia ku a diskubrí e krísis aki dor di e outoridatnan kompetente?
Ta bèrdat ku Gabinete Rhuggenaath konsistiendo di partidonan PAR, MAN i PIN tabata na altura di e krísis finansiero di ENNIA pero nan a opta pa no hasi ningun intento pa resolvé e problema aki, i laga Gabinete Pisas heredá esaki pa na su turno Gabinete Pisas bai buska un solushon?
Ta bèrdat ta trata aki di alrededor di 30.000 siudadanonan nan penshun di behes sigurá i ku huntu ku nan famia esaki ta yega alrededor di 75.000 mil persona lo bai keda gravemente perhudiká?
Ta bèrdat ku CSBS (Banko Sentral) huntu ku su Komisariadonan tabata na altura di e krísis di ENNIA? Si ta si for di ki dia nan tabata na altura i ki paso nan a tuma pa salbaguardiá e penshun di e aseguradonan?
Den e kaso aki Banko Sentral asumiendo su ròl komo e “Toezichthouder” no a faya ku esaki barbaramente? kiko ta e konsekuensha di e fayo aki i ken tin ku bai asumí responsabilidat di esaki?
Minister no ta di akuerdo ku mi ku Banko Sentral tambe ta parti di e problema? Ki ròl nan a asumí den e problema aki? Ku kua solushon of senarionan nan a presentá komo solushon pa e problema di ENNIA aki tantu riba e parti di e presupuesto 2024 i tambe e parti ekonómiko di pais?
Minister loke ta preokupámi ta e manera ku krísis finansiero últimamente ta ser atendé pa nos Banko Sentral. Ora ta pidi informashon, Banko Sentral ta rekurí na nan obligashon di konfidensialidat, pero na momento ku e krísis manifestá nan ta tresé pa gobièrnu resolvé. Nos no mester lubidá e kaso resien di Giro Bank N.V. Mi kier urgí gobièrnu pa hasi un studio profundo na e manera ku Banko Sentral a bini ta manehá krísis finansiero ku tur su implikashonnan. Gobièrnu ta dispuesto pa hasi e studio aki?
Ku kiko Banko Sentral lo bai kontribuí finansieramente pa di su parti e tambe yuda kubri gastunan di e krísis finansiero di ENNIA aki?
Ta bèrdat nos lo yega nos “rentelastnorm”ku e fiansa aki i den e último informe di IMF nan a mustra riba e nesesidat pa gobièrnu hasi e invershonnan nesesario pa asina stimulá kresementu ekonómiko i atendé ku nos problemanan sosial?
Ta bèrdat CFT tambe a duna su remarka kritiko riba e problema aki i kiko tabata nan opinion riba esaki?
Ta bèrdat Hulanda ke finansiá e préstamo aki bou di kondishon? kiko ta e implikashonnan di e kondishonnan bou di kual Hulanda ke finansiá e préstamo aki?
Minister na aña 2010 nos pais a kuminsá ku un debe abou pero rápidamente nos a bini ta endeudá nos mes na Hulanda ku práktikamente nos a hipoteká futuro di nos yunan, nietonan i ku e espasio finansiero por lo tantu lo bira solamente posibel a base di mas medida riba un pueblo ku ya no tin espasio pa mas medida?

Mi a tuma nota ku gobièrnu ta den konsulta ku gobièrnu di Sint Maarten esaki ta nifiká ku kontrario di e kaso di Giro Bank N.V. Sint Maarten den e kaso aki lo bai karga su responsabilidat i atendé realmente ku e kaso di ENNIA.
Ta bèrdat tin “aangifte” hasi riba e krísis finansiero di ENNIA? For di ki dia esaki a keda hasi i dor di ken òf kua instansha?
Ta ken i kua instansha ta keda responsabel pa e krísis finansiero di ENNIA?

Señor Minister Silvania, e senario ku nos tin nos dilanti ta pintando un krísis skur i nunka bisto riba nos pais. Gabinete Pisas ku a heredá problemanan finansiero ekonómiko i sosial for di Partidonan PAR, MAN i PIN ku nunka a opta pa karga nan responsabilidat dor di resolvé problemanan finansiero ku nan mes a kousa ku e enkargo ku pueblo di Kòrsou a duna nan for di aña 2017. Ta solamente a hinka e pais den mas problema dor di krea défisit tras di défisit, i krísis tras di krísis i laga pa otro bin solushoná.

Minister en todo kaso bo por konta ku e sosten di Frakshon di MFK i nos ta urgí i nos ta lag’é na bo diskreshon kon abo lo bai atendé i solushoná e krísis finansiero di ENNIA teniendo en kuenta pais i e 30.000 mil penshonadonan ku en total 75.000 hendenan ku di un manera òf otro ta dependé di e penshun ku nan lo bai keda perhudiká pa mal maneho finansiero. Nos kurason ta bati pa nos pais i nan.

Rekordando bo persona na e obligashon den nos Areglo di Estado pa duna miembronan di Parlamento tur informashon rekirí i na e obligashon den e Protokòl firma entre Parlamento i Gobièrnu pa duna e informashon aki no mas tardá ku denter di dos (2) luna, Frakshon di MFK ta keda en espera di bo kontesta.

Atentamente,