MINISTERIONAN DI GMN, HUSTISIA, KPC I DIERENBESCHERMING A KUMINSA ATENDE KASO DI BAKA KU TA KANA LOS RIBA KAYA I TAMBE KACHONA N PELIGROSO

MINISTERIONAN DI GMN, HUSTISIA, KPC I DIERENBESCHERMING
A KUMINSA ATENDE KASO DI BAKA KU TA KANA LOS RIBA KAYA I TAMBE KACHONA N PELIGROSO
E siman aki a tuma lugá un reunion na GMN Colon entre representantenan di Ministerio di GMN, Ministerio di Hustisia, Kuerpo di Polis Kòrsou i tambe representantenan di Stichting Dierenbescherming, kaminda a trata e tópiko di baka ku ta kana los riba kaya. Tambe den e reunion aki a trata e tópiko di kachónan ku ta kana los riba kaya i morde hende.
E reunion tabata unu sumamente interesante, kaminda a trese puntonan di e lei L.O.O. di 2015 ku ta atendé ku tur kos ku tin di aber ku órden públiko.
Ampliamente a deliberá riba e bakanan ku ta kana los den bisindario di Aeropuerto Hato ku ta por kousa peliger pa tráfiko. E fin di siman aki Polis i funshonarionan di GMN a keda di tene un reunion ku doño di e bakanan ku tin “vlakte” di San Pedro.
A disidí ku lo traha un relato ku lo bai pa tantu Minister di GMN komo Minister di Hustisia ku e rekomendashonnan kon mester atendé e asuntu aki na un forma duradero i ku lo evitá ku den futuro lo tin bestianan ta kana los riba kaminda públiko i tambe pa atendé ku e kachónan peligroso ku ta morde.
Riba e kombinashon di foto aki por mira representantenan di e diferente Ministerionan i tambe di Stichting Dierenbescherming ku a akudí na e reunion aki.
Lo kontinuá ku e reunion di konsulta dia 27 di sèptèmber 2023.