Minister Javier Silvania NO TIN DEDUKSHON DI ONTVANGER MAS FOR DI MI AOV: KIKO ESAKI TA NIFIKÁ PA MI?

Minister di Finansa, Javier Silvania, a anunsiá via retnan sosial ku entrante luna di òktober Ontvanger lo stòp ku dedukshon for di penshunnan di AOV di SVB. E notisia positivo aki a lanta e preguntanan nesesario serka penshonadonan riba kua e minister ke duna klarifikashon.

Penshonadonan ku ta risibí un penshun di AOV di SVB i ku ta kustumbrá ku Ontvanger ta retené un parti di esaki tur luna pa paga debenan di impuesto lo ripará ku e retenshon aki no ta tuma lugá mas for di e luna aki. For di awor tur penshonado lo risibí e penshun di AOV ku nan tin derecho riba dje den su totalidat. Sin embargo, esaki no ta nifiká ku tur penshonado ta eksonerá di paga impuesto manera OZB. E eksonerashon aki ta aplikabel solamente si e penshun di AOV ta e úniko entrada ku e penshonado ta risibí. Na e momentu ei por argumentá ku e penshonado no tin e espasio finansiero pa paga e debe di impuesto. Sin embargo, si un penshonado tin otro forma di entrada ademas di su penshun di AOV, manera un penshun adishonal òf entrada di hür, e ora ei ta spera ku e debe di impuesto lo wòrdu pagá riba base di e kapasidat ku por karga.

Den e kaso aki Ontvanger ta determiná e kapasidat di amortisashon (paga) basá riba e datonan di entrada disponibel. Den kaso ku un penshonado tin un penshun adishonal, por ehèmpel di APC, e ora’ei Ontvanger por opta pa pone un retenshon periódiko riba e penshun aki. Sin embargo, den ningun kaso Ontvanger lo no hasi un dedukshon mas for di e penshun di AOV.

Ounke tur hende mester kontribuí na entrada di impuesto i di primanan segun nan kapasidat, kobra e debe di impuesto di penshonadonan ku un kapasidat di amortisashon hopi limitá no mester ta e prioridat di Ontvanger. Esaki ta eksaktamente e motibu dikon dor di e ahustenan organisatorio i di maneho den Servisio di Impuesto e énfasis di e kapasidat di kobransa lo wòrdu poné riba klientenan komersial entrante e luna aki. Den kobransa di partikularnan ta duna prioridat na kobransa di debenan di impuesto ku mas kapasidat di amortisashon. Minister ta konsiente ku ta difisil pa hopi siudadano yega fin di luna i ta spera ku e ahustenan den maneho aki, inkluyendo e paro di dedukshon di penshun di AOV, por hasi algu pa prinsipalmente e grupo aki. E grupo ku tin hopi mester di kada florin.