Minister Pisas a partisipá na konferensha di “High-Level Ministerial Session for the 17th Convention of Parties on the Carthagena Convention” na Aruba
Minister Pisas a partisipá na konferensha di “High-Level Ministerial Session for the 17th Convention of Parties on the Carthagena Convention” na Aruba
Willemstad – Djabièrnè dia 6 di òktober último, Minister di Asuntunan General enkargá ku Medio Ambiente i Naturalesa señor Gilmar Pisas a partisipá na un enkuentro na Aruba riba invitashon di United Nations Environment Programme (UNEP). Ta trata aki di e seshon ministerial di e di 17 Konferensha di e Konvenshon pa Protekshon i Desaroyo di Ambiente Marino pa Karibe i Latino Amerika.
Durante e seshon aki a trata tópikonan relashoná ku protekshon i desaroyo di ekosistemanan marino den Karibe i Latino Amerika kual ta metanan di sumo importansha pa Kòrsou tambe.
Durante e sehon di nivel haltu aki na kua Minister Pisas a partisipá a enfatisá importansia di koperashon regional i kon pa logra e metanan di Kunming- Montreal Global Biodiversity Framework kual ta metanan relashoná ku saneamentu di ekosistemanan i eksistensha di espesienan pa aña 2050.
Den e kuadro aki lo trata tópikonan manera:
- Mandato i interakshon di Cartagena Convention pa logra metanan di Montreal
Global Biodiversity Framework. - E responsibilidat pa paisnan desaroyá “National Biodiversity Strategies and
Action Plans (NBSAPs)”. - Meta 30 pa 30 di Montreal Global Biodiversity Framework pa tur pais protehá
30% di su laman i 30% di su zona di kosta. - Kordinashon i komunikashon i kolaborashon entre paisnan i organisashonnan
intergubernamental.
Ademas tabatin un aspekto interaktivo ku e paisnan partisipante kaminda a identifiká, visualisá i rekonosé e komplesidat, diferente interesnan i konsiderashonnan pa ku maneho i uzo di kosta i rekursonan marino. E parti aki a ilustrá ku nos mester tene kuenta ku tur faktor momentu ku ta bini desaroyonan riba diferente área.
Na final di e seshon a yega na konklushonnan riba kua e diferente paisnan lo bai sigi traha huntu i Minister Pisas tabata un di e promé nan ku a firma un MOU riba e tereno aki. Firmamentu di e MOU aki ta hasi Kòrsou i su partnernan den regio mas fuerte pa huntu kombatí konsekuenshanan di kambio di klima, polushon marino, pèrdida di habitat, sobrepeska, invashon di Sargassum i malesanan di koral.
