𝐍𝐎𝐒 𝐌𝐄𝐒𝐓𝐄𝐑 𝐊𝐑𝐄𝐀 𝐌𝐀𝐒 𝐄𝐍𝐓𝐑𝐀𝐃𝐀 𝐏𝐀 𝐃𝐑𝐄𝐂𝐇𝐀 𝐍𝐎𝐒 𝐏𝐀𝐈𝐒

Kòrsou mester bai na introdusí impuesto di entrada pa turista
“visitor entrance fee” i eleminá OB riba kamber.
Kambio den nos sistema fiskal ta nesesario pa e tempu di awor ku nos ta biba aden. E kambio mester nifika baha e peso di impuesto riba komunidat pero tambe generá mas entrada pa kaha di Gobièrnu.
MAN-PIN ta konvensí ku mester kuminsa analisá i ehekutá seriamente e kambionan aki.
OB riba kamber di hotel i apartamentu ta un di e retonan grandi ku gobièrnu tin pa haña komo entrada den kaha.
Esaki ta bini sigur di apartamentunan ku ta keda di hür ku turista kual ta repartí riba Kòrsou kompleto. Turismo ta un di e sektornan kual ta kresiendo tantu na kantidat di turista pero tambe kamber di estadia.
E kantidat di apartamentonan, kasnan i kambernan ku ta hür ku turistanan via di AirBnB, booking.com i otro plataformanan digital, pero ku no ta paga OB(“roomtax”) ta enorme. Esaki ta hasi imposibel pa gobièrnu kontrolá esaki. Te na ora logra hiba un kontròl, e lo kosta komunidat hopi sèn i energia pa logra kobra na un manera efisiente tur loke ku debe.
Pa e motibu aki MAN-PIN ta di pensamentu ku mester introdusí “visitor entrance fee” (impuesto di entrada) kaminda ku ta keda kobra direktamente na entrada. Di e forma aki gobièrnu ta risibi entrada mesora.
Ora nos mira proyekshon di sifranan di e kantidat di turista ku ta bishitá nos pais nos ta mira ku kada aña esaki ta oumentá. Ku e oumento aki lo nifiká ku e entrada tambe lo oumentá ora nos introdusí e impuesto di entrada.
Esaki lo nifika ku gobièrnu tin mas entrada pero tambe lo tin mas fondo disponibel pa ofisina di turismo sigui hasi e trabou di promoshon pa Kòrsou.
Banda di esei gobièrnu lo tin mas entrada kual por invertí den infrastruktura, mobilidat, enseñasa, limpiesa di nos pais i tambe desaroyo sosial.
E impuesto aki ta konosí na Boneiru kaminda e turista pa paga75 dòler i a eliminá nan “kamerbelasting” pa asina di un manera efisiente kobra entrada for di e sektor hotelero i tambekrea un “level playing field” unda di un manera igual ta aportá den desaroyo duradero di turismo.
𝗞𝗔𝗟𝗞𝗨𝗟𝗔𝗦𝗛𝗢𝗡
Kòrsou, konforme sifranan di 2023 a risibí 500 mil bishitante ku lo yega entre 650 mil pa 700 mil turista na 2025. Ku introdukshon di e “visitor entrance fee” basá riba un promedio di 600 mil turista (ekskluyendo esunnan menor di edat) ta nifiká ku Korsou lo por tin un entrada di 45 mion dòler ku ta mas o ménos 81 mion florin pa aña.E entrada di 81 mion florin aki ta nifiká ku gobièrnu no mester duna CTB supsidio di 15 pa 20 mion florin pa aña mas i ku CTB lo por oumentá su presupuesto pa invertí den un turismo duradero.
Esaki pues sin ku gobièrnu mester saka 15 pa 20 mion florin pa por kompletá e entrada di OB riba kamber di hotel ku ta mas o ménos un 15 mion florin pa aña di e manera aki CTB por yega na su presupuesto total di 30 pa 35 mion florin. Pa e motibunan aki MAN-PIN ta di opinion ku Kòrsou mester kuminsa tuma pasonan diferente pa por krea mas entrada pa gobièrnu, sin ku mester pone peso riba nos pueblo.
Mientras ku mester hasi un análisis pa nos sá e impakto di kresementu di nos turismo i kuantu mas nos por krese di e manera aki sòru pa un bon balansa. Esaki ta úniko manera nos por traha riba un maneho duradero di nos turismo.
MANPIN

Giselle Mc William