Torneo di polo akuátiko di fin di aña di ORCA un gran éksito
Torneo di polo akuátiko di fin di aña di ORCA un gran éksito
Dia 2 te ku 16 di desèmber e torneo anual di ORCA di polo akuatiko a tuma luga na Pisina Bennie Leito. Ku mas di 80 hungadó dividí den tres team den e kategorianan di edat U12, U14 i senioren, e torneo a wordu hunga via un sistema round-robin riba djaluna i djaweps anochi, i e finalnan a tuma luga riba dia 16 di desèmber.
U12: Partido fasinante ku team di coach Illen komo ganadó
Na e kategoria U12, e tim di coach Illen a dominá riba e timnan di coach Tina i coach Ulay. Den un final hopi fasinante, nan a gana ku 12-10 kontra e tim di coach Ulay. Hungadonan Joshua, Camila i Mason a sobresalí ku nan golnan, tambe keepernan Eldrikson i Usheener a destaká ku nan bon trabou den gòl.
U14: Ulrich ta guia su tim pa viktoria
Den e kategoria U14, e kombate tabata hopi duru. Finalmente, e timnan di coach Solange i coach Javier a keda den final. Ku Ulrich komo topscorer absolutu, e tim di coach Solange a gana ku 13-9. E tim di coach Valentijn a risbí nan medaya di bròns. E timnan di hubentut a demonstrá ku nan ta dominá e weganan kada bes mas miho, i por a konta ku un bon aplauso di mayornan i supporter.
Senior: Tim di coach Bas ta gana e título
Na e kategoria senioren, e wega tabata hopi fasinante. E final a tuma lugá entree timnan di coach Mike i coach Bas, mientras ku e team di coach Javier a terminá na di tres lugá. Den un final hopi tenso, e team di coach Bas a gana ku un diferensia chikí di 2 punto ku un skòr pertá di 12-10.
Ambiente deportivo rekonosimentu pa partisipante
E torneo tabatin un ambiente hopi deportivo, danki na e tremendo trabou di e rèfri di ORCA ku a guia e weganan ku hopi profesonalismo. Tur partisipante a risibí un medaya pa nan prestashonnan: oro, plata òf bròns.
ORCA ta sera e aña ku un fiesta di Pasku
Dia 17 di desèmber anochi, ORCA ta sera e aña deportivo ku un diner di Pasku pa tur miembro. E direktiva ta mira bek riba un aña eksitoso yen di aktividatnan di landa, landa synchroon i polo akuatiko, tantu na nivel rekreativo komo na nivel di kompetensia. Den 2025, lo tin mas kompetensianan lokal i internashonal i timnan di tur disiplinanan lo biaha pa eksterior pa representá ORCA.
ORCA ta agradese tur miembro, coach, rèfri, boluntario i supporter pa nan kontribushon na e torneo exitoso aki i ta warda ku entusiasmo un aña deportivo nobo!
