Kredibilidat di e gobièrnu aktual enkabesá pa minister presidente Pik Pisas a baha bou di  sero 

 

Kredibilidat di e gobièrnu aktual enkabesá pa minister presidente Pik Pisas a baha bou di  sero 

Simultaneamente ku e entrevista ku nos minister presidente sr. Pik Pisas tabata duna ayera tokante dos mandatario mas  di e gabinete aktual ku mester baha, tabata pasando algu sumamante remarkabel. Praktikamente tur e komentarionan  ku tabata wòrdu ekspresá dor di esunnan ku tabata sigui e entrevista via FB di vigilante, tabata reakshonnan sumamente  negativo i di desaprobashon.  

Nos di Partido Nashonal a tuma nota di ekspreshonnan manera :  

Ta kua e gobièrnu bruá aki? – Tin mas na kaminda pa baha pronto – Si e gobièrnu aki sigui asina lo e bai kaba na nada  djis aki – Ora ta buska hende pa bira mandatario, mester paga tino ta ken ta skohe – No tin hende na tino mas pa goberná  Kòrsou? – Mihó sera kas di Kòrsou! – Ta kon ta hasi goberná den tantu nòkelmentu asina? – Ki dia Pisas mes ta baha?  – Sòri, esaki ta delaster kuater aña pa boso! – Puntra Pisas ta dikon a dura tantu asina pa atendé ku minister  plenipotensiario? – Kon a para ku e 200 dollar pa taxi ku tabata kobra? – Min Fin a manda vudu fuerte riba nan for di  Surnam – Ai Dios ta kiko ta pasando ku Kòrsou su gobernashon? – Mester warda pa tende kiko ta bin gaña pueblo  atrobe – Pone elekshon di nobo – No por bisa ku e gobièrnu aki tin maneho. 

Eseinan ta djis algun di e komentarionan ku nos por a tuma nota di dje riba retnan soshal ayera. PNP no ta ripití e  reakshonnan aki pasombra nos ta gosa ku nos pueblo ta den un estado di animó depresivo asina aki, pero nos a ripití  nan pa nos djis para ketu un ratu na e indikashon ku pueblo ta dunando di su desapunto den e gobiernu aktual.  Komo demókrata Christian nunka nos lo por gosa si e gobièrnu ku ta goberná nos país ta den problema pasombra e  país ta di nos tambe.  

Ta fresku den nos memoria kon despues di elekshon e lider maksimo di MFK a ekspresá ku ta:  “bari nos a bari nan i awor nos so ta bai goberná”. Ta remarkabel ku den menos ku 6 luna tres mandatario di e gabinete  aktual mester bandoná gobièrnu. Esaki ta un terser parti di nos gobièrnu. Promé tabata trata di nos minister di finansas  ku a wòrdu retirá dor di mando di partido MFK sin ku te awe pueblo a haña un splikashon konvinsente ta dikon esei a  sosodé. Sea ku nos tabata di akuerdo ku su forma di profilá óf no, e tabatin un di e karteranan di mas importante den e  gabinete aktual. Tipo di kambionan abrupto asina sigur ta trese instabilidat i deskonfiansa den kualkier gobernashon.  Awor ta bini 2 mas aserka. Un di nan ta trata di e minister plenipotensiario na Ulanda. Ta trata aki di un funshon  strategikamente hopi importante pa nos relashonnan i asuntunan den reino ku mester wòrdu atendé ku seriedat. Tabata  konosí for di durante di e gobernashon anterior ku tabatin hopi problema na kas di Kòrsou i tòg ta bolbe nombra e  mesun persona den e funshon aki. Pues PNP no por yega na niun otro konklushon ku minister president, ku ta esun  polítikamente responsabel pa e funshon aki, no ta realisá e importansia i balor stratégiko ku e funshon ei tin pa nos aki  na Kòrsou.  

PNP no ta kere ku ta pasombra pueblo a duna un partido 41000 voto e por hasi kos di kièr i pensa ku e pueblo ta sigui  sostené e tipo di desishonnan deskabeyá aki. PNP pronto lo publiká, djis pa ilustra, un lista di promesanan ku e gobiérno  aktual a hasi ku nunka a tuma lugá i ku ketu bai pueblo ta warda riba nan. E manera di atendé aki ta pone ku hinter e  gobièrnu ta haña un “label” di ta inkonfiabel i ku su kredibilidat ta baha bou di sero. Tempu ku PNP tabata partner  den koalishon huntu ku MFK tabata titulá PNP komo férfelu. Sinembargo PNP komo un partido ku su base ta ankrá riba sierto prinsipionan, e tabata sóru pa un balanse, i òrdu i no tabata pèrmití pa akshonnan deskabeyá tuma lugá. 

Atentemente, 

Dudley Lucia 

Presidente