WoMen’s Steering Committee Curaçao ta habri aña ku Santu Sakrifisio di Misa

WILLEMSTAD – Djadumingu 25 di Yanüari Direktiva di WoMen Steering Committee Curacao, i representantenan di organisashonnan afiliá na WSCC, a bini huntu durante di un Santu Sakrifisio di Misa na Misa Maria Auxiliadora na Sta. Maria. Esaki pa yama Dios danki pa e guia spiritual den trabounan realisá durante di 2025 i pa yama bon biní na e aña nobo.

Sra. Mirieta Lourens-de Lanoy, presidente di WSCC, a bisa ku deseo di WSCC ta pa 2026 ta un aña aña di salú, inteligensia i fortalesa pa kada organisashon afiliá na WSCC i kada miembro personalmente.

“Nos ta hopi agradesí na tur e gruponan afiliá na WSCC. Huntu nos ta forma un ret ku ta traha pa hustisia sosial i desaroyo di komunidat di nos dushi Kòrsou. Aña 2025 ta un aña durante kua nos a siña hopi, a traha i krese huntu. Un aña ku a tabatin su retonan, pero a abase di fe i perseveransia nos a logra mayoría di nos meta i proyektonan. Aworaki, ku e mesun fe, nos ta wak dilanti pa 2026.

Pa e aña nobo aki, nos tin plannan kla i un kompromiso fuerte. Nos ke sigui traha di manera serio i konsistente riba empoderashon di e hende muhé, e hende hòmber i famianan. Nos ta kere ku un komunidat ta realmente fuerte ora e hende muhé ta fortifiká, e hende hòmber ta inkluí i famianan ta sostené.

Den 2026 alabes nos ke sigui traha riba mas kolaborashon ku partnernan pa asina nos por sigui sirbi nos komunidat. Nos tin e deseo pa mas grupo afiliá na WSCC. Huntu nos por logra mas i union semper ta fuerte.

Nos vishon ta den línea ku loke na nivel mundial Nashonnan Uní ta promové; inklusividat, igualdat i desaroyo sostenibel pa un i tur. E balornan aki ta netamente loke nos fe ta siña nos. Tambe pa nos tin rèspèt pa kada hende, kuido pa otro i responsabilidat pa salbaguardiá un futuro di perpektiva pa tur hende i generashonnan ku ta sigui. Ku Dios sigui iluminá nos mente i guia nos pa asina nos por kontinuá ku nps trabou i nos proyektonan komo boluntario.