Promé Minister Pisas ta habri ofisialmente e 5th Caribbean Conference Curaçao 2026

WILLEMSTAD – Djasabra 23 di mei 2026, Promé Minister di Kòrsou, sr. Gilmar Pisas, a asistí na apertura ofisial di e 5th Caribbean Conference Curaçao 2026, ku ta tuma lugá na Renaissance Wind Creek Curaçao Resort. E konferensia internashonal aki ta reuní profeshonalnan, ekspertonan i spesialistanan den radiologia, radioterapia i ‘medical imaging’ for di diferente pais den Karibe i otro parti di mundu.

E konferensia ta wòrdu organisá dor di Caribbean Association of Radiographers and Radiation Therapists and Medical Image Practitioners, den kolaborashon ku NASKHO, Netherlands Caribbean Foundation for Clinical Higher Education. Durante tres dia, e partisipantenan lo deliberá riba inovashon, teknologia moderno i mehorashon di kuido pa pashènt den sektor di salubridat.

Den su diskurso di apertura, Promé Minister Pisas a enfatísá ku radiologia i radioterapia awor ta forma un pilar sentral den sistema moderno di salubridat. El a indiká ku detekshon tempran di malesa, uso di teknologia avansá i invershon den kuido preventivo ta fundamental pa garantisá un sistema di salubridat sostenibel, spesialmente pa Small Island Developing States manera Kòrsou.

Promé Minister Pisas a papia tambe riba e desaroyo rapido di teknologia den e sektor, manera inteligensia artifisial, radiotherapia adaptivo i digitalisashon den kuido médiko. El a enfatisá ku apesar di e progreso teknológiko, hende ta keda e faktor mas importante den salubridat:
“Technology alone does not improve healthcare. People do.”

Durante su mensahe, Promé Minister a resaltá e importansia di interkambio di konosementu, kolaborashon regional i kontinuashon di siñamentu profeshonal pa fortalesé kuido di pashènt den henter region Karibense.

Na final di su diskurso, Promé Minister Pisas a deklará e 5th Caribbean Conference Curaçao 2026 ofisialmente habrí.