CBCS ta inisiá implementashon di Sistema di Garantia di Depósito pa Sint Maarten 

Sint Maarten ta publiká legislashon di Sistema di Garantia di Depósito 

CBCS ta inisiá implementashon di Sistema di Garantia di Depósito pa Sint Maarten 

PHILIPSBURG/WILLEMSTAD — Centrale Bank van Curaçao en Sint Maarten (CBCS) a kuminsá  implementá e Sistema di Garantia di Depósito (DGS) pa Sint Maarten, awor ku e dekreto nashonal  korespondiente a ser publiká dia 14 di ougùstùs 2026 (AB 2026, no. 29). Riba e mesun fecha,  Minister di Finansa di Sint Maarten a firma un areglo ministerial (AB 2026, no. 31) den kua ta elaborá  e sistema DGS den mas detaye. E sistema DGS pa Sint Maarten lo drenta na vigor dia 28 di  sèptèmber 2026. Unabes ku introdusié, e depositantenan di henter e union monetario lo tin  kobertura bou di un sistema di garantia di depósito. Esaki lo krea mas konfiansa den nos sistema  finansiero i den stabilidat di nos union monetario. 

E legislashon di DGS ta konta pa e institutonan di krédito ku tin un lisensia di CBCS pa operá komo  instituto di krédito na Sint Maarten. E sistema DGS ta protehá e depositantenan na momento ku  un instituto di krédito no por kumpli mas ku su obligashonnan. E ta kubri te Cg 50,000 ku kada  doño di kuenta tin na kada banko i te Cg 25,000 di kada doño di kuenta na kada kooperativa di  krédito. 

DGS ta garantisá ku e doñonan di kuenta ku keda perhudiká lo risibí nan sèn bèk te na e máksimo  sigurá, denter di 20 dia di trabou. E fondonan pa esaki lo bini di e fondo Depositogarantiefonds  (DGF). Deposit Guarantee Fund Foundation Sint Maarten, ku CBCS a lanta, lo atministrá e fondo  akí. Tur aña, kada instituto di krédito mester paga un kontribushon anual na DGF, basá riba e  volúmen di deposito garantisá ku e tin. CBCS i DGF Foundation lo ta responsabel konhuntamente  pa kumpli ku e tareanan relashoná ku e sistema DGS. 

CBCS lo sigui traha estrechamente ku e stakeholdernan konserní pa informá públiko kon DGS ta  funshoná i kiko ta su benefisionan. Pa respaldá e trabou akí, CBCS a lansa un wèpsait spesial pa  DGS, ku informashon detayá. Pa mas informashon, bishitá http://www.dgs.sx òf kontaktá nos DGS  Helpdesk via DGS@centralbank.sx. Pa sigui trese mas klaridat riba e tópiko akí, CBCS lo lansa un  kampaña di konsientisashon mas den fin di aña. 

Willemstad, 3 di sèptèmber 2026 

CENTRALE BANK VAN CURACAO EN SINT MAARTEN