Gobièrnu di Kòrsou i e sindikatonan den komishon sentral di sindikatonan a yega na sierto palabrashonnan tokante ehekushon di akuerdonan riba asuntunan di ámtenarnan

Dia 26 ougùstùs último, Konseho di Minister di Kòrsou i e 5 sindikatonan representá den Konsulta Sentral riba Asuntunan di Ámtenarnan (“Centraal Georganiseerd Overleg in Ambtenarenzaken/CGOA”), esta ABVO, STRAF, SITEK, SAP i NAPB, a yega na sierto palabrashonnan tokante ehekushon di e Ordenansa Nashonal tokante Konsulta Organisá riba Asuntunan di Ámtenarnan (Landsverordening Georganiseerd Overleg in Ambtenarenzaken/GOA).

Tumando na konsiderashon e prinsipionan ankra den “ILO Convention no. 151” i e Ordenansa Nashonal tokante Konsulta Organisá riba Asuntunan di Ámtenarnan, partidonan a akordá ku e ehekushon di e Ordenansa Nashonal aki lo wòrdu diskutí na nivel tékniko, ku e meta pa den 30 dia yega na palabrashonnan pa un bon funshonamentu di e Konsulta Sentral riba Asuntunan di Ámtenarnan.

Partidonan a palabra tambe ku lo hasi un inventario di e akuerdonan ku ainda no a wòrdu finalisá òf ehekutá kompletamente, pa despues konhuntamente por atendé ku esakinan.

Spesífikamente partidonan a akordá ku den un periodo di 3 luna lo traha riba un plan konkreto pa atendé e akuerdonan di 2014 ku ainda no a wòrdu finalisá. E plan akí mester indiká di ki manera i den kuantu tempu lo kumpli ku e akuerdonan menshoná ariba. Ta trata aki partikularmente di e siguiente kuater akuerdonan:

1. Indeksashon;
2. Renumerashon i struktura di salarial;
3. Sistema di evaluashon i
4. Revisashon di e sistema di penshun.

Ku e palabrashonnan aki, partidonan ta konfirmá e importansia di e Konsulta Sentral riba Asuntunan di Ámtenarnan, ku énfasis riba un implementashon struktural, efektivo, transparente i kontrolabel di e akuerdonan hasi entre nan.

Pa Gobièrnu di Kòrsou:

S. Hato
Minister di Maneho di Gobernashon, Planifikashon i Servisio Públiko (BPD)

Pa Komishon Sentral di Sindikatonan:

ABVO
NAPB
SAP
SITEK
S.Tr.A.F.