E seminario di tres dia, organisa pa FIU-Aruba den colaboracion cu e Financial Intelligence Units di Hulanda, Corsou y Sint Maarten, ta enfoca riba fortalecemento di e lucha conhunto contra labamento di placa, financiamento di terorismo y otro formanan di criminalidad financiero.

Minister di Finansa, Asunto Economico y Sector Primario, Geoffrey Wever, a habri oficialmente y durante su discurso a enfatisa cu innovacion economico y integridad financiero ta bay man den man.

“Aruba ta enfoca riba un sector financiero moderno y innovativo, den cual digitalisacion, FinTech y tecnologia nobo ta contribui na crecemento economico. Pero innovacion mester bay man den man cu seguridad, confiabilidad y integridad. Un sector financiero solido ta un condicion importante pa desaroyo economico sostenibel,” segun minister Wever.

E minister a destaca tambe e compromiso concreto di su ministerio pa fortalece FIU-Aruba. Den e ultimo periodo a pone mas di Afl. 4 miyon disponibel pa modernisacion di e sistemanan di tecnologia di informacion di FIU-Aruba. E inversion aki lo permiti e organisacion pa procesa informacion financiero na manera mas sigur, analisa fluho di placa compleho y intercambia informacion di manera mas efectivo cu su socionan nacional y internacional.

Tecnologia so no ta suficiente. Pa combati criminalidad financiero di manera efectivo, colaboracion estrecho entre FIU-nan, autoridadnan supervisorio, institucionnan financiero, instancianan di investigacion y Ministerio Publico ta indispensabel.

“Criminalidad financiero no conoce frontera. Pesey nos colaboracion, nos conocemento y intercambio di informacion mester traspasa frontera tambe. Den Reino nos tin conocemento y experiencia valioso cu nos por comparti pa fortalece otro,” minister Wever a comenta.

E seminario ta reuni profesionalnan di diferente parti di Reino. Banda di discusionnan strategico tocante efectividad di e lucha contra criminalidad financiero, e programa ta inclui un masterclass internacional tocante metodonan moderno di labamento di placa y investigacion financiero.

Cu e apertura oficial di e seminario aki, gobierno ta reafirma e importancia cu Gobierno di Aruba ta duna na un sector financiero innovativo, confiabel y resistente, como fundamento pa desaroyo economico y pa mantene confiansa den Aruba como un hurisdiccion financiero internacional.