Diálogo ku organisashonnan di Bándabou tokante seguridat, ladronisia i desaroyonan den e área

Koperashon entre KPC, Politur i kompanianan priva di seguridat tabata sentral den e diálogo.

 

WILLEMSTAD – Minister di Hustisia, mr. Shalten Hato, a reuní ku representante di diferente organisashon di Bándabou pa dialogá tokante e situashon di seguridat i e desaroyonan den e área. Durante e enkuentro a pone atenshon spesial riba e kasonan di robo na playanan, ladronisia i e nesesidat di fortalesé e sintimentu di seguridat di habitantenan i bishitantenan.

Na mesa tabata presente representantenan di Fundashon VIBA i Pilarnan di Westpunt, un organisashon ku ta reuní habitantenan i miembronan di diferente organisashon ku ta representá e área di Westpunt. Polisnan di Bario di Bándabou tambe a partisipá aktivamente den e diálogo.

E representantenan a kompartí nan preokupashonnan i sugerensianan tokante e desafionan ku Bándabou ta enfrentá. Tambe a diskutí e kresementu positivo di turismo den e área, ku ta trese oportunidatnan ekonómiko, pero alabes ta eksigí mas atenshon pa seguridat.

Koperashon entre KPC, Politur i seguridat privá

Un punto importante di e diálogo tabata e trabou di Politur i su koperashon ku Kuerpo Polisial Kòrsou (KPC). A pone énfasis riba e importansia di koordinashon, vigilansia, prevenshon i interkambio di informashon pa atendé e problemanan di seguridat den e área. Minister Hato a resaltá ku kompanianan di seguridat privá tambe tin un ròl importante den e totalidat aki. Nan kontribushon, den koperashon ku KPC, Politur i otro instansianan, por yuda fortalesé prevenshon, vigilansia i protekshon di habitantenan, bishitantenan i negoshinan den e área.

Minister Hato a enfatisá ku desaroyo di Bándabou mester bai man den man ku seguridat, pa garantisá un ambiente trankil tantu pa habitantenan komo pa bishitantenan. “Un komunidat sigur no ta eksigí solamente akshon firme, sino tambe ku nos skucha kiko ta biba den nos barionan. Bándabou tin un gran potensial di desaroyo, i seguridat mester forma parti integral di e desaroyo aki”, Minister Hato a indiká.

[FIN DI KOMUNIKADO]