Training di “Detentierecht i Vreemdelingrecht” na personal di SDKK.

Willemstad – Durante dianan 12 di òktober pa 21 di òktober 2026, na The Triangle Curaçao, a tuma lugá dos siman di training ku Opleidingsinstituut Dienst Justitiële Inrichtingen (ODJI), na personal di Sentro di Detenshon i Korekshon Kòrsou (SDKK).

E tópiko ku a keda tratá durante e training di ODJI tabata ‘detentierecht i vreemdelingrecht’. Tur esaki por tabata posibel, pa medio di estrecho koperashon entre Ministerio di Hustisia i Buitenlandse Zaken en Koninkrijkrelaties (BZK).

Durante e training akί, e personal di SDKK lo bai risibí vários informashon balioso, pa e por usa durante su labor e.o.:

– Konsientisashon riba diferente area di detenshon,

– Reglanan i prosedurá durante detenshon di un detenido òf indokumentado,

– Kon pa aktua profeshonalmente durante situashon di agreshon i tambe outoridat ku bo tin komo personal di prizòn,

– Refuerso di outoridat i seguridat den praktiká i hopi mas.

Tur esaki a keda duna pa señora T. Blanken, ku ta un trainer profeshonal di Opleidingsinstituut Dienst Justitiële Inrichtingen (ODJI) for di Hulanda.

Mas aleu señora T. Blanken di Opleidingsinstituut Dienst Justitiële Inrichtingen tabata tin un enkuentro ku señor Anthony Hasselmeijer komo direktor suplente di SDKK, kaminda por a interkambia riba diferente punto di interes i tambe a risibi un regalo di parti SDKK.

Finalmente SDKK i Ministerio di Hustisia ta sumamente kontentu pa ku e koperashon di trabou i tambe e training ku a keda duná na e personal di prizòn. Esaki sigur lo duna un aporte grandi na e personal ku diariamente ta traha ku detenidonan i indokumentadonan. Den e siman binidero lo sigui ku mas training kaminda lo trata e tópiko di “Motiverende Bejegening”.

Potrètnan training di “Detentierecht i Vreemdelingrecht”