Minister Boekhoudt ta fortalesé kolaborashon ku Aruba pa importashon di karni for di Colombia
Salubridat Públiko, Medio Ambiente i Naturalesa
Minister Boekhoudt ta fortalesé kolaborashon ku Aruba pa importashon di karni for di Colombia
Publiká riba 29 Òktober 2026
Oranjestad, 26 di òktober 2026 – Minister di Salubridat, Medio Ambiente i Naturalesa (GMN), Tyron Boekhoudt, a firma un Memorandum of Understanding (MoU) huntu ku minister Mervin Wyatt-Ras di Aruba, pa fortalesé kolaborashon entre ámbos pais den kuadro di importashon di karni di baka for di Colombia. E akuerdo ta un paso importante pa sigui garantisá seguridat di kuminda i protekshon di salú públiko na Kòrsou.
E MoU ta resultado di e reunionnan ku a tuma lugá durante e Vierlandenoverleg di novèmber 2025, kaminda Aruba i Kòrsou a ekspresá nan intenshon pa traha mas serka huntu den e área akí. Minister Geoffrey Wever di Aruba tambe a desempeñá un papel importante den e trayekto, kontribuyendo aktivamente pa logra realisashon di e akuerdo.
Pa medio di e akuerdo, ámbos pais lo kompartí konosementu, eksperensia i informashon, i kolaborá riba auditorianan, kapasitashon di personal i fortalesementu di proseduranan di kòntròl. Kòrsou, ku ya tin eksperensia ku importashon di karni for di Colombia, lo kompartí su konosementu ku Aruba, miéntras ku ámbos pais lo sigui mehorá nan propio sistemanan di supervishon.
“Pa nos ta fundamental ku e kuminda ku ta yega riba mesa di nos famianan ta sigur. Kolaborashon entre nos paisnan ta yuda nos fortalesé e kòntròlnan, kompartí eksperensia i protehá salú di nos pueblo. Esaki ta un responsabilidat ku nos ta tuma seriamente,” minister Boekhoudt a indiká.
E MoU ta pone énfasis riba trazabilidat di produkto, etiketering korekto i proseduranan kla pa aktua rápidamente den kaso di un insidente ku por afektá seguridat di kuminda. Kada pais ta mantené su propio responsabilidat legal i regulatorio, inkluyendo e akuerdonan formal ku outoridatnan di Colombia.
Minister Boekhoudt a ekspresá su apresio pa e kolaborashon ku minister Wyatt-Ras i e kontribushon importante di minister Wever, komo tambe pa tur e ekspertonan i funshonarionan ku a kontribuí na realisashon di e akuerdo.
Minister Boekhoudt ta i lo sigui duna kontenido na e kolaborashon regional, ku enfoke riba un sistema di importashon di kuminda mas sigur, efisiente i responsabel, poniendo salú i bienestar di pueblo di Kòrsou na promé lugá.
