Miss International 2026: Samiah Booi ta presentá proyekto sostenibel na Promé Minister Pisas

Willemstad – Promé Minister Gilmar Pisas a risibí Samiah Booi, Miss International Curaçao 2026, pa un presentashon di su proyekto ku ta konektá agrikultura, turismo sostenibel, ekonomia sirkular i maneho di desecho. E enkuentro a tuma lugá djarason 21 di òktober 2026, den presensia di Minister di Desaroyo Ekonómiko, sr. Middelhof; Minister di Salubridat Públiko, Medio Ambiente i Naturalesa, sr. Boekhoudt; i Minister Plenipotensiario na Hulanda, sr. Sidney “Bicho” Justiana.

Durante e reunion, Samiah a presentá su vishon i a eksplorá posibilidatnan pa establesé un kolaborashon ku Gobièrnu, partikularmente ku Ministerio di Salubridat Públiko, Medio Ambiente i Naturalesa (GMN). E meta ta pa krea un base sólido pa e kontinuidat i desaroyo sostenibel di e proyekto na largo plaso.

Promé Minister Pisas a mustra su interes den e inisiativa i a splika e proseso i e pasonan nesesario pa por inisiá un posibel kolaborashon ku Gobièrnu. Tambe a papia tokante sigui na mesa pa profundisá den e propuesta i eksplorá kon e instansianan konserní por aportá na su desaroyo.

Samiah a informá tambe tokante e enkuentro ku el a sostené ku e Komishon di Metanan di Desaroyo Sostenibel (SDG) den luna di sèptèmber. Promé Minister Pisas a ekspresá su apresio pa e kontakto aki i a stimulá pa sigui eksplorá posibilidatnan di kolaborashon ku e komishon.

E presentashon a ofresé oportunidat pa interkambiá idea tokante kon inisiativanan ku ta kombiná agrikultura, kuido pa medio ambiente i turismo por kontribuí na un desaroyo mas sostenibel di Kòrsou.

Samiah, kende ta masterstudent den International Business Law i desaroyadó di proyektonan di agroturismo, lo representá Kòrsou na Miss International 2026 na Hapon den luna di novèmber pròksimo. Ku su partisipashon, e lo tin e oportunidat pa presentá Kòrsou riba un plataforma internashonal i kompartí su kompromiso ku sostenibilidat i desaroyo di komunidat.