Gran interes pa charla “Kòrsou i Hustisia Reparativo” na Museo Tula
Gran interes pa charla “Kòrsou i Hustisia Reparativo” na Museo Tula
WILLEMSTAD – E charla “Kòrsou i Hustisia Reparativo”, organisá pa Fundashon Museo Tula djadumingu 8 di novèmber na Landhuis Kenepa, a atraé un kantidat grandi di partisipante. E sala tabata kompletamente yen i esaki ta un señal klá di e interes ku ta eksistí den nos komunidat pa e tema di reparashon i hustisia reparativo.
Durante e charla, parlamentario sra. Suzanne Camelia-Römer a kompartí su reflekshonnan i konklushonnan tokante e di tres konferensia regional di CARICOM riba reparashon, ku a tuma lugá na Barbados na sèptèmber último. Su presentashon a duna e presentenan un bista amplio di e desaroyonan internashonal, e strategianan regional i e pasonan ku Kòrsou por konsiderá den su propio proseso di hustisia reparativo.
Di rekonosementu históriko pa akshon konkreto
Un di e puntonan sentral di e presentashon tabata e evolushon di e plan di dies punto di CARICOM, ku a nan a presentá na 2014 i revisá na 2026. E plan revisá ta pone mas énfasis riba un aserkamentu hurídiko, polítiko, diplomátiko i di desaroyo. Tambe ta buska un kolaborashon mas estrecho entre Afrika i Karibe pa fortalesé e demanda internashonal pa reparashon.
Durante e presentashon, Camelia-Römer a trata diferente prioridatnan stratégiko ku a sali dilanti na e konferensia na Barbados. Entre nan, fortalesé e relashon entre Afrika i Karibe, desaroyo di un strategia di negosashon, investigashon históriko, edukashon i un kolaborashon mas estrecho entre organisashonnan nashonal i internashonal.
Kòrsou mester prepará su mes pa e proseso di reparashon
Un parti importante di e charla tabata dediká na e desaroyonan históriko di Kòrsou i e siguiente pasonan ku nos isla por konsiderá. Camelia-Römer a presentá un resúmen di diferente momentonan importante den nos historia, kuminsando ku e lucha di Tula na 1795, e rekonosementu di Papiamentu, e rehabilitashon di Tula komo héroe nashonal i e diskulpanan ofisial di gobièrnu hulandes i Rei Willem-Alexander pa pasado di sklabitut. Segun e puntonan presentá, Kòrsou ta enfrentá diferente reto den su preparashon pa posibel negosashonnan tokante reparashon. Entre esakinan, falta di sufisiente investigashon históriko, divishon polítiko, kapasidat institushonal limitá i e riesgo di kuminsá negosiashonnan sin un preparashon adekuá.
Den e konteksto aki, Camelia-Römer a presentá diferente proposishonnan pa sigui. Entre otro, instalashon di un Task Force Nashonal di Reparashon, aktiva e organisashonnan relashoná ku historia di sklabitut pa duna konseho di maneho, sigui ku investigashon históriko i habri un archivo, desaroyá un agenda nashonal pa deskolonialisashon, reparashon i sanashon. Tambe a resaltá e importansia di koordiná ku e strategia di CARICOM, krea un base amplio di sosten nashonal i prepará e pais bon promé ku kuminsá negosashonnan ku Hulanda. Un mensahe importante di e presentashon tabata ku éksito di e proseso di reparashon ta dependé di preparashon, unidat i evidensia, i no solamente di e negosashonnan mes.
Hustisia reparativo i sanashon di nos komunidat
Otro aspekto importante ku a wordu tratá tabata e konsekuensianan sosial ku e proseso di reparashon por tin. E presentashon a pone atenshon riba e riesgo di polarizashon, divishon den komunidat, reapertura di trauma históriko i desinformashon. Pa evitá esaki, a presentá e importansia di un diálogo nashonal, partisipashon aktivo di komunidat, kampañanan edukativo i inisiativanan dirigí riba sanashon i rekonsiliashon. E meta final di hustisia reparativo no mester ta solamente kompensashon, sino tambe fortalesementu di unidat nashonal, sanashon i desaroyo di nos sosiedat.
Públiko a partisipá aktivamente
Despues di e presentashon, esnan presente a haña oportunidat pa hasi pregunta, kompartí nan punto di bista i duna rekomendashonnan. E interakshon aki a kontribuí na un diálogo konstruktivo tokante e futuro di hustisia reparativo na Kòrsou. Esaki ta mustra ku tin nesesidat di mas informashon i espasio pa diálogo tokante e tema aki. Reparashon ta un asunto ku ta toka nos historia, nos identidat i e futuro di henter nos komunidat.
Fundashon Museo Tula ta anunsiá “Siklo di Kurso di Reparashon Hustu”
Pa sigui fortifiká e nesesidat di informashon i konosementu den komunidat, Fundashon Museo Tula lo kuminsá ku un seri edukativo bou di e nòmber “Siklo di Kurso di Reparashon Hustu”. Durante e siklo aki, partisipantenan lo haña mas informashon tokante e diferente aspektonan di reparashon, e historia di sklabitut, e desaroyonan regional i internashonal, i e nifikashon di hustisia reparativo pa Kòrsou. Ku e inisiativa aki, Fundashon Museo Tula ke sigui stimulá konosementu, konsientisashon i partisipashon di komunidat den un tema ku ta di gran importansia pa nos presente i futuro.
Mas informashon tokante e programa i fechanan di e siklo lo keda publiká via e kanalnan ofisial di Fundashon Museo Tula.
Fundashon Museo Tula ta gradisí parlamentario Suzanne Camelia-Römer pa su presentashon, i tur esnan ku a asistí i kontribuí na e diálogo durante e charla.
