Minister Koeiman ta tene enkuentro ku representantenan di organisashonnan di barionan Seru Grandi – Fuik i besindario pa realisá un sentro multifunshonal pa e barionan
Minister Koeiman ta reuní ku organisashonnan di bario Seru Grandi – Fuik i besindario pa duna kontenido na realisashon di un sentro multi-funshonal pa e barionan
WILLEMSTAD – Resien Minister Koeiman a reuní ku representantenan di organisashon di bario di Seru Grandi/Fuik i besindario.
Gobièrnu di Kòrsou huntu ku organisashonnan di bario di Seru Grandi/Fuik i besindario, a inisiá un proseso pa yega na un plan pa kombertí e skol ku tabata ántes Mgr Julio Henriquez, den un sentro Multi Funshonal pa habitantenan di e barionan Seru Grandi/Fuik i besindario.
E barionan menshoná ta karesé di un lokalidat pa ehekushon di aktividatnan sosial, kultural, edukativo, deportivo na bienestar di mucha, hóben i hende grandi. Representantenan di e diferente organisashonnan ya a trese nan diferente punto i proposishonnan ku nan ke mira realisá den e edifisio ku ántes tabata e skol di fundeshi pa Seru Grandi/Fuik i besindario. Ta e intenshon pa lanta un tim inter-ministerial, ku huntu representantenan di bario, en konhunto, yega na un plan konkreto pa e sentro multi-funshonal ku sosten di gobièrnu di Kòrsou.
Di esnan presente a bini masha hopi proposishon i idea positivo pa e proyekto bira unu mas eksitoso posibel. Minister Presidente Koeiman a informá ku Gobièrnu di Kòrsou lo hasi tur loke ku ta na alkanse pa logra ku e plan akí lo kristalisá i sirbi komo un plan piloto pa otro barionan di Kòrsou den futuro.
Ya gobièrnu a pone na disposishon di e sentro personanan di e barionan mes pa tene e lokalidat limpi i un persona ku tambe ta di e bario, pa kordiná aktividatnan entre otro di rekreo, sosial-kultural-edukativo, deportivo i hopi otro tipo di aktividatnan mas den kolaborashon di diferente fundashonnan ku ta risibí supsidio di gobièrnu manera Kas di Kultura, Teatro Luna blou, Federatie Antilliaanse Jeugdzorg.
