Prome Minister Evelyn Wever-Croes Discurso di Prome Minister na ocasion di reconocemento di sr. Nelson Orlando Oduber: UN ROLE EHEMPEL DI INTEGRIDAD CU NOS GOBIERNO TA PARA P’E DIARIAMENTE.

Prome Minister Evelyn Wever-Croes

Discurso di Prome Minister na ocasion di reconocemento di sr. Nelson Orlando Oduber:

UN ROLE EHEMPEL DI INTEGRIDAD CU NOS GOBIERNO TA PARA P’E DIARIAMENTE.

 

Dialuna a tuma luga e cambio di nomber di ‘Sasakiweg’ na Avenida Nelson Orlando Oduber. Durante e ceremonia official, Prome Minister Evelyn Wever-Croes a duna su discurso na unda el a enfatisa e trayecto den politica di Señor Nelson Orlando Oduber, Nel. 

Gobierno den nomber di henter e comunidad Arubiano ta duna honor, respet y reconocemento na un gran yiu di tera. sr. Nelson Orlando Oduber a sirbi nos pais den diferente funcion politico y gubernamental, como candidato y lider di MEP durante 36 aña, tres periodo como diputado, pa hopi aña miembro di Eilandsraad y miembro di Parlamento y cuater biaha sr. Oduber tawata  Minister President di pais Aruba.

Tur e funcionnan aki ta coincidi cu e trayectoria impresionante di sr. Nelson Oduber cu durante tur e añanan cu el a sirbi nos pueblo, a trece logronan impactante pa e comunidad Arubano. Ta p’esey Gobierno di Aruba a haya cu ta e momento propicio pa duna un reconocemento bon mereci na e gran Arubiano aki haciendo un cambio di nomber di e caretera ‘Sasakiweg’ den ‘Avenida Nelson Orlando Oduber’.

Hopi siguramente ta puntra nan mes pakico Gobierno di Aruba a nombra e Avenida aki na honor di sr. Nelson Oduber. E contesta ta simpel. No tin duda cu tabata sr. Nelson Oduber kende como diputado a percura na 1983 pa introduci e plan di infrastructura turistico, “Plan Sasaki”, caminda a percura pa mas di 100 hectar di tereno wordo desaroya pa construi facilidadnan turistico y cual plan a encera entre otro construccion di varios caretera nobo, entre otro e caretera principal for di Eagle te Malmok, conoci como ‘Sasakiweg’.

E vision di sr. Nelson Oduber e tempo ey a resulta uno corecto y en especial na momento cu refineria Lago a cera su portanan na 1985 y cu nos pais a dicidi di concentra riba e industria di turismo, cual a lo largo a bira e pilar economico di mas importante di nos pais. E Plan Sasaki aki a trece cu ne cu den transcurso di añanan un gran cantidad di hotel, time share, condominio, shopping mall, cinema, restaurant, supermarket, night club y otro actividadnan recreativo a ser desaroya den e area turistico aki. Pues Plan Sasaki a resulta fundamental pa cu e infrastructura y desaroyo exitoso di nos industria di turismo den e ultimo añanan.

Mirando e hecho cu pa 35 aña largo e caretera “Sasakiweg” nunca a haya un nomber oficial, for di aña pasa caba Gobierno a tuma e decision pa nombra e caretera principal aki na nomber di e gran Arubiano Nelson Orlando Oduber y esaki danki na su vision y determinacion pa cu Plan Sasaki y su impacto riba nos turismo.

Banda di Plan Sasaki, sr. Oduber a logra hopi mas pa Aruba. Proyectonan cu a contribui grandemente na crecemento di nos economia. Locual ta resalta tambe ta cu sr. Nelson Oduber ta un lider cu pueblo Arubano por a depende riba dje, un homber corecto, humilde y honesto, un gobernante y lider integro y ehemplar. Sin duda cu sr. Oduber ta un role model pa e integridad cu nos Gobierno ta para pe diariamente.

“Ta p’esey den nomber di comunidad Arubano mi ta gradici sr. Nelson Oduber pa tur loke el a haci pa nos pais durante su carera briyante den politica y gobernacion y ta spera cu ora e ta core riba Avenida Nelson Orlando Oduber, cu e sa cu e comunidad Arubano ta orguyoso di su persona y ta aprecia tur su bon obranan pa cual el a dedica gran parti di su bida”, Prome Minister Evelyn Wever-Croes a expresa.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: