District 297 Webinar

District297 ta un Proyecto ehecuta pa Aruba Futura Foundation y tin e vision pa trece talento y conocimento for di e Diaspora na Aruba cu e speransa cu nos ta crea espacio pa nos Arubiananon den exterior por muda bek na Aruba (‘brain gain’). Esaki ta importante pasobra nos talentonan lo juda contribui na un economia mas resiliente y “future-proof” pa Aruba. Nos kier logra esaki por medio di crea plataformanan unda cu nos Diaspora y Arubianonan local (personan, negoshinan y institutionan) por intercambia, connecta y collabora ariba e bienestar di nos pais Aruba.

E plataformanan cu nos ta crea ta un website (den progreso), eventonan y naturalmente nos ‘social media’. Nos website lo brinda e oportunidad pa tur Arubiano den exterior por pone nan profiel y asina encontra otro. Negoshinan y institutonan na Aruba por usa e website pa busca talento Arubiano y promove nan vacaturanan y stage. Lo tin mas uso pa e website pero esakinan ta e principal. 

Pa motibo di COVID-19, nos no ta organisa eventonan fisico mas y ta pesey nos a cuminsa cu nos series di webinar. E prome webinar nos a duna informacion tocante e situation na Aruba ora COVID-19 a jega nos isla. Despues nos a hasi un webinar tocante agricultura unda nos a invita Santa Rosa y dos agricultor local pa splica kico ta e status di agricultura na Aruba y alavez elabora ariba e oportunidad y contratiempo pa cual mester ayudo. Despues di esaki nos a duna un oportunidad pa tur presente hasi pregunta y duna ideanan. Nos ta warda e ideanan y comparti esakinan cu instancianan of personanan relevante. Nos ta haya hopi reacion despues di nos webinar cu hendenan cu kier juda cu cualkier solucion y nos ta hasi nos best pa trece nan den contacto cu esnan cu nan lo por juda. Pues, nos ambition di mas grandi ta pa crea connection.

 

Ariba nos medianan social nos a pidi nos audiencia vota cual topico nan tabata kier nos cubri den nos proximo webinar. E topiconan tabata entre otro “Refinery property”, “Mental health during COVID-19″, “Future of work”, “ Medicinal Cannabis”, y “Renewable energy”. Via, twitter, facebook, linkedin y instagram tur hende por a vota y masomenos 70% a scohe pa “Medicinal Cannabis”. Den futuro nos ta spera pa sigi cubri mas di e otro topiconan tambe.

Cu e webinar di ‘Medicinal Cannabis’ cu ta planea ariba 16 di juni, nos kier informa y intercambia ideanan ariba e topico aki cu e intencion di trece mas conocimento pa nos audiencia. E intencion ta pa duna splicacion di e mata y e oportunidadnan cu e por tin pa e economia di Aruba, en particular e parti medicinal. Tambe nos kier tuma un momento pa trece padilanti otro aspectonan menos conoci manera nutrition, decontaminacion, beyesa etc.

Na final nos kier intercambia ideanan cu nos audiencia cu nos por comparti cu e instancianan relevante. E pensamento tras di esaki ta cu e Diaspora por tin hopi informacion nobo of di un otro angulo cu por ta relevante pa Aruba y mas cu claro nos Arubianonan local cu ta atende tambe tin ideanan pa trece padilanti.

Cordialmente nos kier invita tur Arubaniano local y den exterior cu tin interes den e topico aki pa atende y comparti cu nos.

This site uses Akismet to reduce spam. Learn how your comment data is processed.

error: Content is protected !!
%d bloggers like this: