Un karta ku pregunta pa Minister Eugene Rhuggenaath, ku topiko. Trahadónan na Kas di Kultura, pronto lo ta sin trabou i Kòrsou sin un entidat pa representá pueblo su historia, kultura, arte i tradishonnan

 

 

Willemstad, 17 ougùstùs 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di OWCS, Eugene Ruggenaath.

 

Danki pa e koperashon.

 

Atentamente,

 

Jacinta Constancia

Parlamentario pa

Frakshon di MFK

Minister di OWCS

Señor Eugene Ruggenaath
PRESENTE

Kòrsou, 17 di ougùstùs 2020

Tópiko: Trahadónan na Kas di Kultura, pronto lo ta sin trabou i Kòrsou sin un entidat pa representá pueblo su historia, kultura, arte i tradishonnan

 

Señor Minister Ruggenaath,

 

Suskrito Parlamentario pa Movementu pa futuro Kòrsou (MFK) a risibí informashon ku djaluna 17 ougùstùs 2020, riba dia di lucha pa libertat trahadó nan di Kas di Kultura a risibí oportunidat pa pasa firma karta di retiro.

 

Bentura di e fundashon a pone komo kondishon, ku si e empleadonan kier risibí e pago final ku nan mester firma e karta di retiro. Ku otro palabra si no firma no ta risibí plaka i ku empleadonan tin te 31 ougùstùs 2020 pa firma e famoso karta di retiro aki.

 

Alabes den e karta ta pone e empleado na altura pa e no bai prensa i duna informashon di loke ta pasando ku nan. Esaki ta un forma di intimidashon baho i inhumano pa trata e grupo di empleadonan ku durante di hopi aña a laborá na bienestar di kultura di Kòrsou. 

 

Konforme artíkulo 96 di Reglamentu di Orden, frakshon di MFK ta aserka Minister di OWCS, ku e siguiente preguntanan;

 

1. Minister ta na altura di e grupo grandi di hende(nan) ku a pèrdè trabou na Kòrsou i e grupo ku ta bai pèrdè trabou na Kas di Kultura?

 

1. Minister por informá Parlamento kuantu e porsentahe di desempleo tabata na final di aña 2016 i kuantu esaki ta awor aki? 

 

1. Minister ta na altura ku un entidat ku ta risibí supsidio di gobièrnu, ta trapa riba un derechi demokrátiko di su empleadonan i prohibí nan di bai prensa si nan ta sinti e nesesidat aki?

 

1. Minister ta na altura ku gobièrnu lo bai duna supsidio na e entidat nobo ku lo bai lanta i ku lo bin na lugá di Kas di Kultura?

 

1. Minister por informá Parlamento ku e trahadó ku awe ta ser retirá i menasa, ku nan lo ta e proménan pa wòrdu tuma den servisio di e entidat nobo?

 

1. Minister por informá ku ta tolerá e diktadura aki òf gobièrnu lo entrega un keho penal kontra e fundashon aki?

 

1. Minister ta haña ku ounke ku plaka ta importante pa hende por biba un bida desente ku dignidat i un trato humano ta bal mas ku e plaka?

 

1. Minister a tene kuenta ku e parti humano den e trayekto(nan) aki?

 

1. Minister por informá ku e entidat(nan) nobo ku lo bin, lo no tin mes un mala suerte ku Kas di Kultura?

 

1. Ta bèrdat ku den e Kas di Kultura nobo, ta un persona ku ta un yu di Kòrsou eks polítiko biba na Hulanda ta bin okupá e funshon di direktor?

 

1. Minister por informá for di ki fecha a hasi un ouditoria riba Kas di Kultura i ku a konstatá, ku e entidat mester sera su portanan, Parlamento por risibí dokumentonan unda ta ser indiká e motibunan ku mester sera Kas di Kultura?

 

Na nòmber di trahadónan preokupá di Kas di Kultura, suskrito ta spera ku Minister lo kontesta nos preguntanan den e tempu akordá entre Parlamento i Gobiernu di Kòrsou pa asina por haña bista i klaridat riba e problema aki. 

 

Atentamente,

      

 

Jacinta Constancia

Parlamentario pa

Frakshon di MFK