GOBIÈRNU DI KÒRSOU A TENE E DI KUATER REUNION KU E SENTRALNAN DI SINDIKATO I VBC.

GOBIÈRNU DI KÒRSOU A TENE E DI KUATER REUNION KU E SENTRALNAN DI SINDIKATO I VBC.

 

Willemstad – Promé Minister Gilmar Pisas, na nòmber di Gobièrnu di Kòrsou, a reuní ku e tres sentralnan di sindikato i VBC dia 14 di dezèmber 2021.

 

Esaki tabata e di kuater reunion ku ta tene ku e tres Sentralnan di Sindikato i Vereniging Bedrijfsleven Curaҫao (VBC).

E tres sentralnan di sindikato ta: Central General di Trahadonan di Kòrsou (CGTC), Sentral di Sindikatonan di Kòrsou (SSK) i Sentral Solidaridat Sindikal (SSS).

 

E intenshon ta pa yega na un Plataforma di Tripartite ku ta konsistí di e siguiente partidonan: doñonan di trabou, representante di trahadonan i Gobièrnu i Kòrsou.

 

Durante di e reunion aki a trata e siguiente puntonan: 

1. E situashon ku a reina rondo di un kolaboradó di Minister di Hustisia;
2. Tripartitismo;
3. Kamara di Komersio;
4. Minimumloon;
5. Refineria.

 

E representantenan di Kamara di Komersio (KvK) a reuní ku Promé Minister dia 2 di novèmber 2021 kaminda nan a duna un splikashon riba kiko ta e tareanan di KvK, kiko KvK ta para p’é i dikon KvK ta pensa ku nan tambe tin di forma parti di e plataforma aki. Durante di e reunion di dia 14 di dezèmber 2021 e representantenan di KvK a haña e mesun oportunidat pa kompartí e splikashon aki ku e tres sentralnan di Sindikato i VBC.

 

E reunion a kana den un bon esfera kaminda tabatin espasio amplio pa kada partido por a dialogá i kompartí informashon ku otro riba e puntonan ku a bini dilanti.

 

E siguiente reunion lo ta dia 11 di yanüari 2022.