Minister Dangui Oduber Orguyoso di ta forma parti di partido MEP Awe nos prestigioso partido ta cumpli 51 aña

Minister Dangui Oduber

 

Orguyoso di ta forma parti di partido MEP

Awe nos prestigioso partido ta cumpli 51 aña

 

Dia 9 di februari 1971 Betico Croes dfm a funda partido Movimiento Electoral di Pueblo (MEP). Desde principio MEP a pone su dilanti e ideologia social-democrata, nos structura estatal y un union di henter e pueblo Arubano, sin distincion di rasa, color, religion, status social etc. 

MEP ta wordo considera un partido prestigioso. Un partido cu desde su fundacion a keda un partido grandi y esaki durante 51 aña largo, ya cu MEP despues di su promer salida nunca a yega di baha bao di 7 asiento.

Partido MEP su trayectoria ta impresionante cu logronan sin igual. Asina nos por pensa riba logronan manera nos status aparte, nos himno, nos bandera, nos propio moneda. Despues partido MEP a percura pa schrap e fecha di independencia, percura pa reapertura di nos refineria, plan sasaki, varios proyecto hotelero pa stimula economia. 

Un partido solido cu semper a percura pa tin stabilidad politico y progreso. Un partido cu a conoce solamente 3 lider politico, cual tawata nos libertador Betico Croes, nos lider honarario sr Nelson Orlando Oduber y nos lider actual sra Evelyne Wever-Croes. E solo hecho cu den 51 aña partido MEP a conoce solamente 3 lider ta bisa hopi di e stabilidad, seriedad y responsabilidad cu partido MEP tin pa cu pais Aruba.

Awe cu hopi orguyo mi ta forma parti di nos prestigioso partido MEP. Un partido cu tin e ser humano central y cu semper a traha pa e biniestar di cada ser humano. Pami por ta riba lista di MEP y sigui den footsteps di mi tata ta hacie algo excepcional.

Mi kier a felicita nos votadornan cu semper a carga MEP, nos lider honorario, nos lider actual, nos candidatonan,  nos campañadonan, lidernan di bario y tur nos militancia pa nan  sosten pa nos partido den bon y den malo. 

Pabien MEP cu 51 anja di existencia.