Minister Shalten Hato SERTIFIKADO DI BARBERO PA KLIENTENAN DI SDKK

Awe mainta, 5 di dezèmber 2022, Minister Hato tabata presente na SDKK den kuadro di e seremonia di entrega di sertifikado di barbero na algun kliente di e sentro penitensiario. E mainta festivo aki a konta ku presensia di direktor-adjunct di SDKK, sr. Ricardo, Minister di Desaroyo Sosial, Labor i Bienestar, sra. Larmonie-Cecilia i Minister di Enseñansa, Siensia, Kultura i Deporte, sr. van Heydoorn.

Den kuadro di e trayekto di resosialisashon den SDKK e sentro ta ofresé diferente kurso pa su klientenan. Den e kaso aki sr. Paulo tabatin e enkargo pa siña en total dies (10) kursista den tres luna kon pa ehersé e profeshon di barbero. Tur e klientenan ku a partisipá na e kurso a terminá esaki ku éksito.

Minister Hato i su koleganan Minister a para ketu riba e echo ku e klientenan di SDKK mester probechá di kada oportunidat ku nan haña pa engrandesé nan konosementu. E intenshon ta pa tur kliente sali for di SDKK ku perspektiva nobo i abilidatnan nobo pa por tin un trabou digno i asina mantené nan famia. Minister Hato ke felisitá staf i personal di SDKK i tambe tur kursista ku e logro grandi aki.