TRABOUNAN DI MANTENSHON “CRASHGUARD SAND BARRELS” NA SUBIDA I BAHADA DI BRÙG
MINISTERIO KONSERNÍ TRÁFIKO, TRANSPORTE I PLANIFIKASHON URBANO
TRABOUNAN DI MANTENSHON “CRASHGUARD SAND BARRELS” NA SUBIDA I BAHADA DI BRÙG
PUBLIKÁ RIBA 16 OUGÙSTÙS 2023
Willemstad – Minister Charles Cooper huntu ku Servisio pa Obra Públiko (OW) ta informá ku riba djaweps 17 ougùstùs lo hasi trabounan di mantenshon na e “crashgaurd sand barrels” na subida i bahada di brùg. Esaki ta e barinan hel yená ku santu ku tin na banda di kaminda ora ta subi i baha brùg Koningin Juliana.
Debi na mal estado di e barinan aki, OW lo bai laga kita nan i remplasá nan. Esaki ta trese kuné ku tin vianan, ku ta konektá Kaminda A .A. de Lannoy-Willems Blvd i Presidente Romulo Betancourt Blvd, ku lo ta será mas o menos 2 ora. E kamindanan ku lo wòrdu será temporalmente ta e bahada di brug pa bai direkshon di Abraham Mendez Chumaceiro Blvd (Punda), i subida di brùg A.A de Lannoy Willems Blvd direkshon pa bai Arubastraat.
Ta traha entre 8:30 pa 11.30 di mainta i e kontratista DR General Contractor lo ehersé e trabou aki. Lo bai tin borchi di indikashon i barinan oraño pa indiká ruta alternativo. Ta hasi un apelashon na tur outomobilista pa kore ku koutela.
