AQUALECTRA A SUMINISTRÁ KÒRSOU KU KORIENTE NO OPSTANTE DEMANDA RÈKÒRT DI 143.7 MW

AQUALECTRA A SUMINISTRÁ KÒRSOU KU KORIENTE NO OPSTANTE DEMANDA RÈKÒRT DI 143.7 MW

Willemstad 30 di ougùstùs 2023 – Djaluna 28 di ougùstùs Kòrsou a konosé un demanda di koriente rèkòrt ora ku rònt di 10 ‘or di anochi e demanda pa koriente a yega 143.7 Megawatt (MW). Esaki ta mas haltu ku e demanda rèkòrt ku a keda registrá di 138.8 MW aña pasá riba 5 di sèptèmber. No opstante e demanda históriko aki, Aqualectra a logra proveé komunidat ku e koriente kustumbrá pa asina un i tur por a pasa e anochi trankil.

E dianan aki tin poko bientu pues no por konta kompletamente ku un produkshon haltu di e molinanan. Djaluna por ehèmpel e molinanan di bientu a kontribuí ku solamente 19.7 MW na e demanda total di 143.7 MW produsí. Basá riba e pronóstiko di wer aki por konta ku e próksimo anochinan tambe e kalor lo sigui reina. Danki na e programa aselerá di mantenshon di Aqualectra, i kolaborashon di Curaçao Refinery Utilities (CRU) ku suministro di koriente, tin sufisiente kapasidat pa por suministrá komunidat ku koriente asta ora nos a konosé un demanda rèkòrt manera esun di djaluna último.

Athunto un bista di e e diferente unidatnan di produkshon ku Aqualectra a kombiná pa por a kumplí ku e demanda rèkòrt di djaluna último:

Ekípo	Kapasidat
Mashinnan Konvenshonal	110.8 MW
CRU	13.2 MW
Bientu	19.7 MW

 

Aqualectra ta sigui hasi lo máksimo pa por kumpli ku e demanda nesesario pa komunidat. No opstante ku tin sufisiente kapasidat pa kumpli ku e demanda, Aqualectra ta enkurashá komunidat pa usa koriente konsiente. Ku koperashon di kada un di nos, nos por pasa e tempunan aki di kalor ku nos tur ta eksperensiando.