Despues di a mustra ku Ingles ta importante pa nos hubentut, futuro di nos ekonomia i puesto di trabou  English Immersion School-St. Antonius College ta un echo riba impulso di Kámara di Komèrsio

Despues di a mustra ku Ingles ta importante pa nos hubentut, futuro di nos ekonomia i puesto di trabou

 English Immersion School-St. Antonius College ta un echo riba impulso di Kámara di Komèrsio

 

Willemstad– Na 2012 Kámara di Komèrsio i Industria (KdK) a laga sa den su diskurso anual ku Ingles ta un idioma importante pa nos sistema di edukashon si nos ke bira un nashon ku ta eksportá servisio. Seguidamente na 2019 a bini e rapòrt di KdK “Ban Sembra Awe pa Kosechá Mayan”, kaminda a enfatisá ku mester adaptá nos sistema edukashonal na e konteksto internashonal i tambe na e nesesidatnan di e merkado laboral lokal en bista pa kapasitá nos hubentut i forsa laboral den e idiomanan mundial.

Esaki lo fasilitá nos hóbennan pa konektá mihó ku mundu i tambe pa nan haña empleo i oportunidatnan komersial grasias na e posibilidat pa haña akseso ilimitá na konosementu mundial, rekurso i retnan internashonal.

Datonan di e Ofisina Sentral di Estadístika (CBS) ta indiká ku alrededor di 84% di nos empleadonan ta gana nan pan danki na un trabou den e sektor di servisio, kaminda mayoria di orientá internashonalmente.

P’esei ta agradesé KdK grandemente pa opservá komienso di dos klas di lushi di Grupo 1 na e skol na Ingles Immersion School St. Antonius College.

Tabata na desèmber 2019 ku KdK a invitá e direktivanan mas grandi di skol, esta Direktiva Sentral di Skolnan katóliko (RKCS), VPCO, Fundashon pa Skol Humanista na Papiamentu (FSHP) i International School of Curaçao (ISC), alabes Ministerio di Enseñansa, pa enterkambiá di idea enkuanto e problemátika kon pa drecha e nivel di e enseñansa lokal. Durante e reunionnan aki a identifiká numeroso punto problemátiko. Finalmente a presentá seis área di antenshon ku e proyektonan korespondiente na e Minister di Enseñansa.

Un opstákulo ku a rekonosé rápidamente tabata e dominio defisiente di idiomanan mundial, spesialmente Ingles. Miembronan di gerensia di diferente empresa lokal tambe a mustra e presidente di KvK riba esaki.

Ademas, ta importante pa remarká ku diferente investigashon a remarká ku hóbennan na skol fásilmente ta siña idiomanan (strañero) si nan kuminsá ku esei na edat hóben.

 

Pronto despues RKCS a kuminsá hasi kaso di realisashon di un English Immersion School ku respaldo di ISC. Seguidamente KvK a aserká Konsulado General di Merka pa un petishon di finansiamentu pa por laga investigá e nesesidat i un “fact-finding mission”, loke rápidamente a haña aprobashon di US State Department. A base di esei a kontratá dos perito riba tereno di idioma ku eksperensia vasto na diferente pais pa desaroyá un kuríkulo teniendo kuenta ku e kultura i sirkumstansianan lokal. E ekspertonan aki a traha estrechamente huntu ku un grupo di konseho di dosentenan aktivo lokal pa bini ku e kuríkulo pa e Gruponan 1 te i ku 5 (klasnan di lushi te i ku di 3 klas), ku pronto despues Ministerio di Enseñansa a aprobá.

Loke pa Kámara tambe ta importante ta ku muchanan lokal awor kasi grátis por hasi uso di e sistema edukashonal na e idioma Ingles. KdK ta konfia di asina a duna su granito na bienestar di nos hubentut.

KdK ta konvensí ku St. Antonius College ku Ingles komo idioma di instrukshon lo ta hopi eksitoso i ku nan lo presentá e komprobante ku e skol aki por brinda e muchanan un futuro glorioso pa motibu di e chènsnan enorme ku e studiantenan ku kaba skol lo disfrutá.

Kámara ta ekspresá e speransa ku mas skol den e tipo aki di enseñansa lo ke brinda lo mismo. Di pursi, dos enkuesta a konfirmá e nesesidat grandi. E promé enkuesta di Think-To-Do Institute a mustra ku 87% di e 1000 alumnonan di skol avansá ku a partisipá na esaki a preferá di a haña enseñansa na Ingles. E di dos enkuesta, ku KdK a organisá, a indiká ku 88% di e 515 mayornan ku yu te 6 aña lo ke pone nan yu na un skol ku Ingles komo idioma di instrukshon. KdK ta konfia ku skolnan públiko lo ke sigui e ehèmpel aki.

Finalmente, un bon dominio di e idioma mundial Ingles ta ofresé nos hubentut tantísimo oportunidat, manera akseso na trabou den e industria teknológiko, konosementu i informashon, retnan internashonal, enseñansa universitario, propio empresa i eksplorashon di mundu.

 

 

Kámara di Komèrsio i Industria di Kòrsou