KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

DISKURSO DI PRESIDENTE DI PARLAMENTO – APERTURA DI AÑA PARLAMENTARIO

DISKURSO DI PRESIDENTE DI PARLAMENTO – APERTURA DI AÑA PARLAMENTARIO  

Su ekselensia Gobernador sra. Lucille George-Wout, distinguido  Miembronan di Parlamento di Kòrsou, prome Minister sr. Gilmar Pisas i  honorabel ministernan di gabinete Pisas III, Minister of Tourism, Transport,  Culture, and Sport of Bermuda Hon. Owen K. Darrell, Minister di  Estado,Representantenan di nos organonan di estado, Invitadonan spesial  i nos pueblo stima, felis mainta,  

Na apertura di kada aña parlamentario, nos ta reuni den e sala aki ku no ta  solamente simbolo di nos demokrasia, sino di nos identidat komo pueblo.  Awe nos no ta aki solamente pa skucha kua direkshon gobernashon lo  propone, sino pa reafirmá ku Parlamento ta e wesu di lomba di nos  sistema, kaminda bos di pueblo ta keda skucha i balorá.  

Awe ta un momentu solemne, un momentu di direkshon, un momentu pa  mustra kla ku: Parlamento ta guia pais Kòrsou ku integridat, valentia i  visión pa futuro.  

Señora Gobernador, na nòmber di Parlamento di Kòrsou, mi ke ekspresá  nos mas sinsero gratitut pa bo 12 aña di entrega i dedikashon na nos  pueblo. Bo lideraski a kontribuí pa fortalesé nos institushon i pa inspirá un  generashon di sirbidó públiko. Ku gratitut nos ta mira patras, i ku  speransa nos ta mira dilanti.  

Nos Konstitushon ta kla: Parlamento ta e órgano representativo di pueblo.  Aki ta e kas kaminda nos ta debatí, nos ta buska konsenso, pero mas  importante: aki nos ta tuma desishon den interes general di pueblo di  Kòrsou.  

Nos ta biba den tempu di hopi reto: reto sosial, ekonomiko,  medioambiental, finansiero i di salubridat públiko. Pero kada reto ta un  oportunidat, un yamada pa mas liderato, pa mas unidat i pa mas madures  polítiko.  

Un elemento nobo ku nos ta introdusí awe ta e Premionan di Parlamento  pa un suidadano òf organisashon ku a kontribuí di un manera eksepshonal  den komunidat. E premionan aki lo ta un rekonesementu pa esnan ku ta 

inspirá otro, ku ta sirbi ku amor, i ku ta lanta nos nashon na un nivel mas  haltu.  

Integridat den politika no ta un luho, ta un obligashon. Paso sin integridat,  no tin konfiansa; i sin konfiansa, no tin demokrasia. Pa e motibu ei,  durante e periodo parlamentario aki lo mi kier introdusí un Kódigo di  Kondukta pa Parlamento I un Kolegio ku lo ta enkargá mantene  supervishon di esaki.  

No komo un regla mas, sino komo un kompromiso struktural ku nos  ta insituí. E fundamento di nos sistema demokratiko mester keda kla:  nos siudadanonan mester por konta ku Parlamento ta sirbi ku man  limpi i ku konsenshi kla.  

Na komienso di mi presidensia, mi a eligi tres palabra pa guia mi liderato:  Rekonektá, Rekonstruí i Representá. E palabra nan aki lo sigui guia nos  trabou den e aña legislativo nobo, ku enfoke riba transparensia, integridat i  aksesibilidat di nos Parlamento.  

Nos pueblo ta spera di nos: un futuro di hustisia, seguridat i prosperidat.  Nos demokrasia ta un tesoro fragil ku mester keda protehá, i nos manera  mas sigur di logra esaki ta pa pueblo sigui ta aktivo den proseso  demokratiko, pa wak nos, pa ta kritiko riba nos trabou i pa guia nos. Paso  un Parlamento sin pueblo no ta parlamento. 

Awe, nos ta habri un kapitulo nobo. Un kapitulo di unidat, di refleho i di  inspirashon. Solamente huntu nos por kreá un Kòrsou digno pa tur hende.  

Ku inmenso gratitud, ku fe den Dios i ku amor pa nos pais, mi ta deklará e  aña parlamentario 2025–2026 ofisialmente habrí.  

Dios bendishoná Parlamento, Dios bendishoná pueblo di Kòrsou, i Dios  bendishoná Kòrsou.

 

Leave a Reply

This site uses Akismet to reduce spam. Learn how your comment data is processed.